DIPOLOG CITY, OCT. 19 (PIA) -- Gimugna na sa Malakanyang ang usa ka transition team nga magdumala sa Autonomous Region in Muslim Mindanao hangtud sa piniliay sa 2013.
Kini human nga gideklarar sa Supreme Court en banc nga “Constitutional” kon nahasubay sa konstitusyon ang Akta Republika 10153.
Sa botong 8-7, nagdisisyon ang korte suprema nga Constitutional ang RA10153 nga nag-uktaba sa piniliay sa Autonomous Region in Muslim Mindanao niadtong Agosto 8, 2011 ug nagdungan nini sa lokal ug nasudnon nga piniliay karong umaabot nga Mayo 2013.
Sa pahayag ni Presidente Benigno Aquino III nga gibasa ni Presidential Spokesperson Edwin Lacierda, gipasalamatan niini ang korte suprema sa pagsuporta sa pagpaningkamot sa gobyerno nga mahunong ang “cycle of impunity”, korupsyon ug kapobrehon sa ARMM.
Gawas sa paglig-on sa RA 10153, giila usab sa Korte Suprema ang gahum sa Presidente nga makatudlo ug mga Officers-in-Charge sa ARMM.
“Ang disisyon sa Korte Suprema naghatag kanamo ug dakong kahigayonan nga makorehian ang dugay na kaayong problema sa rehiyon, ug dili kini dapat sayangon,” matod pa sa Presidente.
Sumala pa sa Pangulo, gisuportahan sa iyang administrasyon ang balaodnong magdungan sa piniliay sa ARMM sa lokal ug nasudnon nga piniliay aron mahunong na ang kalagmitang nahitabo panahon sa eleksyon diin ang kadaugan sa usa ka kandidato mahimo lang impluwensiyahan o diktahan sa usa ka gamhanang pamilya sa lugar.
“Kon magdungan ang piniliay sa ARMM ug nasudnong piniliay, dili na magamit sa gamhanang pamilya ang “command votes nga makausab sa resulta sa eleksyon,” pahayag pa sa Pangulo.
Ang command voting nakatampo sa cycle of impunity, sama sa nahitabo sa Maguindanao massacre, diin 57 ka tawo nga gilangkuban sa mga kababayihan ug membro sa media ang way-kukalooy nga gipamatay sa usa ka gamhanang politikanhong pamilya.
Ang sistema nagbunga usab ug halapad nga korupsyon sa mga lokal nga opisyal nga maoy naka-inutil sa kapabilidad sa rehiyon nga makahaw-as gikan sa kapobrehon.(ALT/ATR/PIA9-Zambo Norte)
