ni Franklin P. Gumapon
DIPOLOG CITY, July 24 (PIA) - - Subling gipadas-og
ni Pangulong Benigno Simeon C. Aquino III ang iyang hugtanon nga kampanya batok
korapsyon ug inhustisya ug kadtong nakahimo’g kalapasan sa miaging
administrasyon kinahanglan manubag.
Sa iyang State of the Nation Address (SONA)
kagahapon didto sa Batasang Pambansa, gipasabot ni Pangulong Aquino nga
taliwala sa mga kausaban nga iyang gipatuman karon sa gobyerno, aduna gihapo’y
mga pundok nga naninguha sa pagbabag niini.
Matod pa ni Aquino nga dili niya madawat ang giingon
sa uban nga “forgive and forget” kon pasaylo-on ug kalimtan na lang ang mga kalapasan.
Dugang pa sa Pangulo nga angay bang kalimtan ang
kalapasan ang pagpamalit ug bugas sa laing nasud nga mahimo man unta nga
tabangan ang mga mag-uuma aron molambo ang ilang abot.
“Kinahanglan dili kalimtan sa katawhan ang mga malapason
aron magpabilin ang naandan nilang binuhatan lakip na ang mga utok sa
Maguindanao massacre,” nagkanayon si Aquino.
Alang sa Presidente, pwedeng mopasaylo apan dili
kalimtan ang ilang nabuhat nga kahiwi-an ug kinahanglan nga manubag sila niini.
Alang sa Presidente, ang panaghi-usa mahitabo lamang
kon adunay tinuod nga hustisya.
“Sa kaso nga gisang-at batok ni kanhi Pangulo Gloria
Macapagal-Arroyo, gitagaan siya ug kahigayonan sa pagpanalipod sa iyang
kaugalingon sa korte ug sa ingon nga pamaagi makab-ot ang hustisya,” dugang pa
ni Aquino.
Alang ni Aquino, ang dakung hustisya nga nakab-ot sa
nasud mao ang pagpalagpot ni kanhi Chief JusticeRenato Corona pinaagi sa
impeachment court. (FPG/PCOO/PIA-Zamboanga del Norte)