DIPOLOG CITY, JULY
5(PIA)---Si
Presidente Benigno Aquino III subling mipasalig ug hugtanong suporta sa hiniusang
programa sa Department of Agriculture(DA), Department of Agrarian Reform(DAR)
ug Department of Environment and Natural Resources(DENR) uban ang pag-ingon nga
naghinam-hinam siyang makita ang bunga sa maong programa.
Gustong
masiguro sa gobyerno nga ang mga kahoy nga gitanom ilalom sa hiniusang pagpaningkamot
motubo ug managko, matod pa sa Presidente sa iyang pagpakigpulong atol sa gipahigayong
Wallace Business Forum quarterly Round Table didto sa dakbayan sa Makati
niadtong Miyerkules.
Ang
mga komunidad nga malambigit sa programa maoy magbantay sa kape ug kakaw ug hatagan
ug allowance, matod pa sa Presidente. Midugang pa ang Pamuno Nasod nga sulod sa
usa ka tuig ug tunga ngadto sa tulo ka tuig, managko na ang maong mga kahoy ug
mahimo nang anihon.
Ang
gobyerno nagsugod na ug patuman sa maong programa sa Amihanang Mindanao ug uban
pang lugar diin sa pagkakaron misakop na kini sa 128 mil ka hektarya ang
natamnan ug kape, kakaw, ug uban pang matang sa kahoy, matod pa sa Presidente.
“Naghinam-hinam
na kami. Ang ubang mga eskwater namalhin na. Mas gusto nila sa bungtod. Gumikan
niini, duna na kitay solusyon para sa mga eskwater. Duna na usab kitay solusyon
sa pagpanalipod sa kalasangan, ingon man sa mga programang may kalabutan sa
pagkontrol sa baha,” matod pa ni Presidente Aquino.
“Nagkahiusa
gyud ang daghang mga problema ug ang solusyon niini mao ang butang nga among
gikahinaman. Ug among gisuportahan kining maong programa.”
Ang
CEO sa Nestle Phils. Inc. nagkanayon nga gusto silang molambo ang sektor sa agrikultura
ug matabangan ang mga mag-uuma sa nasod tungod kay nagtoo sila nga duna silay
obligasyon sa katilingban sa nasod sanglit dinhi man nagnegosyo ang Nestle sa
Philipinas.
Gumiikan
niini, mipirma ang Nestle ug kasabutan uban sa DENR. DA ug DAR aron tabangan
ang sektor sa agrikultura sa nasod ug ang panginabuhian sa mga mag-uuma.
Hangtud
niining panahona, nakatanom na ang mga hingtungdan
ug 2 ka milyong semilya sa kape sa 2 mil ka hektarang kayutaan sa nasod. Nabansay-bansay
na nila ang 2,500 ka mga mag-uuma ug nakapahigayon na usab sila ug 2 ka
investors fora.
“Nagtoo
ako nga pinaagi sa hiniusang pagtrabaho, makab-ot nato ang kausaban. Usa kini
ka long-term commitment. Nagtoo ako gikan sa gobyerno ug siyempre gikan sa
industriya. Nagtoo kami nga aron makadani kita ug mga langyaw nga direktang
mobubo ug puhonan sa industriya, nagkinahanglan kita ug daghan nga maayong
kalidad nga produkto sa agrikultura kang kansang presyo ikatandi usab sa uban.
Dinhi nagtoo ako nga dako na kaayo ang papel sa gobyerno,” matod pa ni Miller.
Ang
inisyatibong nagkahiusa namugna pinaagi sa pagpaningkamot sa DA, DENR ug DAR
aron pagdevelop ug usa ka pundasyon para sa malungtarong kalambuan sa
kabaryohan pinaagi sa paghiusa sa mga resources sa tulo ka ahensiya aron maabot
ang labing dakong epekto sa programa sa pagpalambo sa hilit nga bahin sa kapupud-an.(ATR/PCOO/PIA9-Zambo Norte)