Pilipinas makabenepisyo gikan sa pag-uswag sa pamuhunan didto sa UK

By Alma L. Tingcang 

PAGADIAN CITY, June 4  - -  Ang Pilipinas gitakdang makabenepisyo gikan sa gilaomang pag-uswag sa pamuhunan tungod sa gitakdang pagbisita ni Presidente Benigno C. Aquino III didto sa United Kingdom, kini sumala pa sa usa ka opisyal sa Department of Foreign Affairs.

Si Enrique Manalo nga maoy ambassador sa Pilipinas ngadto sa UK  miingon nga ang maong pagbisita sa presidente karong Hunyo 4-6 mas mopalig-on sa bilateral ties sa duha ka nasod ug mopalambo sa kumpiyansa sa pamuhunan alang sa Pilipinas.

Matod pa ni Manalo, ang nasod gilantaw karon sa mga negosyante ug mamuhunan nga taga UK isip usa ka malig-ong puwersa sa Asya tungod sa malahutayong pagsagubang nato sa ekonomikanhong krisis ug labaw na ang positibong pagtubo sulod sa milabay nga tulo ka tuig.

“Ang pagbisita sa presidente dinhi sa UK molig-on ug modasig sa relasyon tali sa Pilipinas ug UK, ug sa iyang pag-anhi dinhi, usa sa mga hisgotan ang maong butang, ang pagpalambo sa pagnegosyo ug commercial relations alang sa pamuhunan. Busa akong nakita nga ang maong pagbisita maoy mobukas sa dugang pang mga dagkong kompanya nga mobutang ug mga negosyo dinhi sa Pilipinas,” si Manalo miingon.

“Sa atong nahibaw-an, ning milabay nga tulo ka tuig nakasinati kita ug positibong pagtubo taliwala sa ekonomikanhong krisis didto sa US. Usa kini ka lugar nga daghan kayo ug oportunidad  ug nagtuo ako nga ang UK investors usab mopahimulos sa maong higayon. Atong ipakita nga makahatag kita ug oportunidad nga makadasig kanila,” matod pa ni Manalo.

Lakip sa pagbisita sa presidente ang usa ka bilateral meeting kauban ni Prime Minister David Cameron diin ang duha ka pangulo gitakdang maghisgot sa political ug economic cooperation, ang partisipasyon sa UK diha sa international contact group (ICG), mga regional ug international issues ingon man anti-corruption ug good governance practices sa duha ka nasod.

      

Makigtagbo usab ang presidente sa mga British investors ug mosalmot sa Philippine fun tourism campaign sa Department of Tourism ingon man makighimamat sa Filipino community didto sa UK, nga maoy kinadak-an sa tibuok Europa.

Ang Pilipinas ug ang UK adunay halapad na kayo nga diplomatic relations sukad pa niadtong tuig 1946. Ang UK maoy kinadak-ang European investor dinhi sa Pilipinas, ika-23 nga trading partner, kinadak-ang tourism market sa Europa ug pinuy-anan sa kinadaghang Pinoy sa maong lugar. (ALT/PCOO/PIA9-Zambo Sur)