Malakanyang, malipayong midawat sa disisyon sa JBC nga lugwayan ang deadline sa nominasyon para sa Hepeng Mahistrado

ni Alfonso T. Ruda

DIPOLOG CITY, JUNE 19(PIA)---Ang administrasyong Aquino malipayong midawat sa disisyon sa Judicial and Bar Council nga lugwayan ang deadline alang sa pagdawat ug nominasyon para sa sunod nga mahimong Hepeng Mahistrado sa korte suprema.

Ang maong lakang gilaumang makahatag ug mas halapad nga partisipasyon sa publiko ug makakuha ug mas daghang kandidato sa posisyon.

“Ang paglugway ug panahon sa nominasyon maghatag ug kahigayonan sa publiko, civil society, academe, ug uban pa nga makatuboy pa ug dugang mga kandidato. Unsay nakataya niining maong kalihokan mao nga makapresentar ug “meritorious nominees” ang JBC para konsiderahon ni Presidente Benigno Aquino III,” matod pa ni Presidential spokesperson Edwin Lacierda.

Nakadisisyon ang JBC nga lugwayan ang nominasyon para sa posisyon sa Hepeng Mahistrado sa korte suprema gikan sa Hunyo 18 ngadto Hulyo 2.

“Mahimo kining ‘landmark moment’ sa atong hiniusang pagpaningkamot nga makab-ot ang reporma sa hudikatura. Sumala sa gipakitang labing ulahing disisyon sa korte suprema, miabot na ang bag-ong panahon sa “transparency ug accountability” sa hudikatura,” dason pa ni Lacierda.

Sayo niini, gidayeg sa Malakanyang ang disisyon sa korte suprema nga ibutang sa ilang website ang budget accountability report sa Labing-taas nga Hukmanan ug sa Presidential Electoral Tribunal.

“Ang pagbutyag sa personal SALNs (Statement of Assets, Liabilities and Networth) ug operasyong-pinansyal, lakip na ang paggasto sa nagkalain-laing pondo, makatabang ug dako sa administraasyon nga masayran ang tukmang budgetary support nga angayng ihatag sa bag-ong madasigong korte suprema,” matod pa ni Lacierda.

Ang puwesto sa Hepeng Mahistrado nabakante human ang senado nga milingkod isip impeachment court mipalagpot kang kanhi Supreme Court Chief Justice Renato Corona niadtong Mayo 29.

Sa botong 20 kontra 3, nakita sa Impeachment Court nga sad-an si Corona gumikan sa dili pagbutyag sa iyang tanang kabtangan, ilabi na ang iyang peso ug dollar deposits nga nakabutang sa nagkalain-laing accounts. (ATR/PCOO/PIA9-Zambo Norte)