Kapin 370 mil ka estudiante sa Grade 7 makadawat ug subsidiya gikan sa gobyerno karong tuig tingtungha, 2012-2013

ni Alfonso T. Ruda

DIPOLOG CITY, JUNE 18(PIA)---Gipadak-an karon sa Departamento sa Edukasyon ug 98 porsiento ang education service contract slots para sa mga estudianteng mosulod ug Grade 7 nga gustong mopadayon sa ilang pagtungha sa sekondarya sa mga pribadong tunghaan gumikan sa kahuot sa mga pampublikong tunghaan.

Si Education Secretary Armin Luistro nagkanayon nga ang gidaghanon sa luna misaka gikan sa 190,536 niadtong tuig tingtungha 2011-2012 ngadto sa 377,277 karong tuiga ilalom sa Government Assistance to Students and Teachers in Private Education(GASTPE) program. “Naggahin kami ug daghang luna para sa mga estudiante sa Grade 7(First Year High School) aron paghatag ug kahigayonan sa daghanang mga estudiante nga makatungha sa sekondarya aron makatapos ug basic education.

Ang kantidad sa grant misaka gikan sa 5,500 pesos ngadto sa 6,500 pesos alang sa First Year Education Service Contracting grantees gawas sa National Capital region karong tuig ting-tungha 2012-2013.

Sumala sa nabutang sa DepEd Memorandum Order no. 94, series of 2012, ang pagdugang sa gidaghanon sa luna gipasikad sa panginahanglan, base sa normal nga kapasidad sa mga pampublikong tunghaan. Para sa Luzon, ang luna mitaas gikan sa 101,520 niadtong miaging tuig ngadto sa  223,781 karong tuiga; sa Visayas, gikan sa 39,305 niadtong miaging tuig, nahimo kining 74,106 karong tuiga; samtang sa Mindanao, gikan sa 49,981 niadtong 2011-2012, misaka usab kini ngadto sa 79,341 ka luna karong tuiga.

Ang GASTPE mao ang nagsubsidize sa tuition fees sa mga estudiante nga nagpa-enroll sa mga pribadong tunghaan imbis nga sa mga pampublikong tunghaan  tungod kay dili naman usab kini nila madawat.

Ang Regional Committee sa GASTPE mao ang responsible sa pag-apod-apod sa Grade 7 ESC slots sa mga mosalmot nga mga tunghaan base sa panginahanglan ug sa gipakitang kapasidad sa tunghaan paggamit sa luna nga unang gihatag ngadto kanila.

Matod pa ni Luistro, ang report sa paggamit sa ESC slots kinahanglang mapadala sa DepEd Central sa Hunyo 30 niining tuiga.(ATR/PCOO/PIA9-Zambo Norte)