Hatagi ug higayon ang JBC nga mosumiti sa listahan sa mga kandidato sa sunod nga Hepeng Mahistrado, matod pa sa Malakanyang

ni Alfonso T. Ruda

DIPOLOG CITY, JUNE 6(PIA)—Ang Malakanyang nagpabiling mibarog nga angayng hatagan ug igu-igong panahon ang Judicial and Bar Council nga mohashas ug mopili sa mahimong sunod nga Hepeng Mahistrado, sanglit kini man lang ang lawas nga dunay mandatu nga mohimo niining maong trabaho.

Sa usa ka press conference, gipahayag sa tigpamaba sa Malakanyang nga si Edwin Lacierda, nga bisan ug mitumaw na ang ngalan nila ni Justice Sec. Leila De Lima ug Internal Revenue Commissioner Kim Henares, isip posibling mga nominees, angay pa gihapong hatagan ug higayon ang JBC nga mohimo sa ilang katungdanan.

Si Lacierda miingon nga bisan ug parehong kuwalipikado ang duha nga mahimong sunod nga Hepeng Mahistrado, anaa pa gihapon nila ni De Lima ug Henares ang pagdisisyon kon dawaton ba nila ang nominasyon o dili,

“Nagtoo ako nga ang pagdisisyon kon ilakip ba sila sa nominasyon, mag-agad lang kini nila ni Secretary De Lima ug Henares. Basta nagpabilin namong gibarugan nga parehong kwalipikado ang duha nga mahimong Hepeng Mahistrado,  apan ang disisyon dili magagikan kanamo kundili sa JBC, matod pa ni Lacierda.

“Ug sa higayong masumiti na ang ilang ngalan alang sa nominasyon, wala usab kami mahibalo kon dawaton ba nila ni De Lima ug Henares ang nominasyon o dili,” dugang pa ni Lacierda.

Gihatagan ug punto ni Lacierda, nga parehong maayo ang gipakitang lihok sa duha sa ilang tagsa-tagsa ka trabaho.

“Pareho silang dunay kahibalo sa balaod ug walay si bisan kinsang makapangutana sa ilang abilidad ug katakos,” matod pa ni Lacierda.(ATR/PCOO/PIA9-Zambo Norte)