ni Alfonso T. Ruda
DIPOLOG CITY, MAY
8(PIA)--- Si
Presidente Benigno Aquino III
mipasalig sa mga nagpasiugda sa paugnat sa kusog sa nasod ug padayong suporta
gikan sa gobyerno aron masiguro nga makuha sa mga Filipinong atleta ang
pagbansay-bansay ug mga ekipos nga gikinahanglan aron ilang makab-ot ang
international sports arena.
Ang
Presidente miluwat sa maong pasalig sa iyang pagpakigpulong sa pormal nga
pagbukas sa 2012 Palarong Pambansa nga gipahigayon didto sa Narciso Ramos
Sports and Civic Center sa Lingayen Pangasinan, kagahapon.
“Makalaum
kamo nga padayong suportahan sa inyong kagamhanan ang pagpalambo sa pa-ugnat sa
kusog sa nasod,” matod pa ni Presidente Aquino.
Iyang
gihatagan ug punto nga gawas sa 200 milyones ka pesos nga pahat sa Departamento
sa Edukasyon para sa Palarong Pambansa karong tuiga, ang gobyerno usab pinaagi
sa Philippine Sports Commission naghan-ay na usab sa nasudnong plano niini- ang
2011-2016 Philippine Sports Roadmap.
Kining
maong roadmap, matod pa sa Presidente, nakatutok sa polisiya sa paugnat sa
kusog kang kansang pagtagad nakasentro sa pagpalambo sa piniling paugnat sa
kusog sama sa boksing, langoy, taekwando, athletics, wushu, archery, wrestling,
bowling, weightlifting ug billiard.
Matod
pa ni Presidente Aquino, 200 milyones ka pesos nga nagrepresentar sa 33 porsiento
nga tinuig nga remittance gikan sa National Sports Development Fund maoy
gamiton aron pondohan ang nasangpit nga roadmap.
Kining
maong pondo, matod pa sa Presidente, maoy gamiton aron gastuhon sa Philippine
National Games nga maghatag ug kahigayonan sa mga magdudula sa kabaryohan nga
makapakita sa ilang talagsaong katakos sa pagpangindahay nga makakuha ug luna sa
Philippine team.(ATR/PCOO/PI9-Zambo Norte)
