Palasyo mibag-o sa iyang commitment pagpanalipod sa mga media practitioners, pagseguro sa kagawasan pagbalita

By: Gideon C. Corgue

PAGADIAN CITY, May 4 (PIA) – Ang kagamhanang Aquino misaad pagpanalipod sa mga tigbalita sa nasud sanglit ang kalibutan nagsaulog sa World Press Freedom Day kagahapong adlawa, Mayo 3, ang opisyal sa Palasyo nagkanayon.

“Kini ang usa sa mga pinakagawasnon sa Asya ug wala nato gipahunong ang kagawasan sa pagpahayag , gani kamo mga tigbalita ang mahinungdanon nga kabahin sa atong nasud, busa kamo ang among giawhag ,” si Presidential Spokesman Edwin Lacierda nagkanayon atol sa regular press conference nga gipahigayon sa Malacanang ning nakalabay nga Huwebes.

“Ang media mao ang kaabag sa kagamhanan pagpalig-on sa nasud,” matud pa niya nga naghubit sa kahimtang sa media sa Pilipinas karon.

Ang tigpamaba sa Presidente mihatag kaseguruhan ang commitment sa kagamhanan paghatag kaseguruhan sa kaluwasan sa mga ginsakpan sa mga tigbalita samtang naghimo sa ilang propesyon.

“kalabot sa kaluwasan, ako ang makahatag kaninyo nga kita dili motugot sa extralegal killings ilabi na sa mga tigbalita. Mataghigayon nga atong madungog nga adunay pagsulay ug hunos sa kinabuhi sa mga ginsakpan sa media, kita gilayon ang mopahibalo sa Philippine National Police. Dili kita motugot sa extralegal killing sa mga tigbalita,” matud pa niya.

Matag Mayo 3 sa kada tuig, ang kalibutran nagsaulog sa World Press Freedom Day pagbag-o sa mahinungdanon nga prinsipyo sa kagawasan sa pagbalita, pagtantiya sa kagawasan pagbalita sa tibuok kalibutan, pagdepensa sa media gikan sa pag-atake ingon man pagtahud sa mga tigbalita kinsa nawad-an sa ilang kinabuhi samtang naghimo sa ilang mga trabaho.

Ang Mayo 3 giproklamar isip World Press Freedom Day sa UN General Assembly sa tuig 1993 human sa rekomendasyon nga gisagop sa 26th session sa UNESCO's General Conference sa tuig 1991.

Kini ang nagsilbi nga okasyon pagpahibalo sa mga katawhan sa mga kalapasan sa press freedom – usa ka pagpahinumdum nga sa mga dosena sa mga nasud sa tibuok kalibutan , ang pagmantala gipugngan, gimultahan, gisuspenso ug gisarado, samtang ang mga tigbalita, editors ug mga tigmantala gihadlok, gi-atake, gipriso ug gipamatay.

Ang Mayo 3 usa ka petsa pag-awhag ug pagpalambo sa mga ibnisyatibo nga 

pabor sa kagawasan sa tigbalita, ug pagtantiya sa kahimtang sa kagawasan sa pagbalita sa tibuok kalibutan.

Ang kasaulugan nagsilbi isip pagpasidaan sa mga kagamhanan sa panginhanglan pagtahud sa kagawasan sa pagbalita. Kini usab ang adlaw sa paghinuklog tali sa mga media professionals sa mga isyu sa kagawasan sa pagbalita ug professional ethics.