DIPOLOG CITY, May 24 (PIA) - - Gipahibalo ni Pangulong Benigno Simeon C.
Aquino III nga ang pagwagtang sa korapsyon ug pagpalambo sa panalapi sa
kagamhanan maoy nakapaag-ni sa mga negosyante sa pagbutang ug negosyo dinhi sa
nasud.
Sa iyang pakigpulong atol sa National Career Advocacy Congress sa Manila,
iyang gipadayag nga nakita sa mga langyawng negosyante ang kausaban ug maayong
panagway sa negosyo dinhi sa nasud ug sila mipasalig nga magbutang sa ilang
puhunan dinhi nga mokabat ngadto sa P2 trilyones sulod sa lima ka tuig.
“Upat ka mga pribadong kompanya ang mobutang sa ilang negosyo balor sa P2
trilyones sa sunod nga lima ka tuig dinhi sa nasud,” nagkanayon si Pangulong
Aquino.
Matud pa ni Aquino, kining nasampit nga mga negosyante nakakita sa
paglambo sa investments dinhi sa nasud sugod sa 2011 nga mikabat na ngadto sa
P746.0 bilyones nga mitala ug pag-uswag ngadto sa 37.6 porsento gikan sa tuig
2010 nga mitala lamang ug P542.7 bilyones.
“Kining maong investments nakahatag ug 194,197 ka mga bag-ong trabaho,”
saysay pa sa Pangulo.
Misaad usab ang Pangulo nga ipadayon niya ang pagbuhat ug mga kaayuhan
alang sa katawhang Pilipino pinasikad sa mga repormang gipatuman sa kagamhanan.
Gidayeg usab sa Presidente ang pagtinabangay tali sa kagamhanan ug
pribadong sektor arun matagamtaman ang bunga sa mga kausaban nga gipahimutang
sa iyang administrasyon. (FPG/PCOO/PIA-Zamboanga del Norte)