ni Alfonso T. Ruda
DIPOLOG CITY, MAY
26(PIA)--- Gitrabaho
karon sa gobyerno ang pakete sa hinabang nga ihatag sa mga lokal nga mag-uuma ug
saging nga naapektuhan sa problema sa patigayon uban sa Tsina alang sa pagpagawas
ug plano alang niini sunod semana.
Sa
regular nga press briefing sa Malakanyang niadtong Biyernes, ang tigpamaba sa
Palasyo nga si Edwin Lacierda nagkanayon nga nakigtagbo na si Presidente
Benigno Aquino III uban sa mga ahensiya sa gobyerno aron tukion ang isyo sa
saging.
“Ang
export sa Tsina nagrepresentar sa 30 porsiento sa atong merkado. Karon, ang atong
long-term nga posisyon nga mapalapdan ang atong merkado. Samtang ang atong
short-term mao ang paghatag ug hinabang sa mga mag-uuma ug saging,” matod pa ni
Lacierda.
“Atong
ilhon kon kinsa ang nagtanom ug saging, tungod kay sama sa akong giingon, ang
export sa Tsina naglangkob lang sa 30 porsiento. Maayo ang atong dagan sa 70
porsiento. Ato silang hatagan … ug
padayon kitang nangitag paagi nga makahatag ug tabang ngadto kanila - cash for
work, tabang-pinansyal, ug tabang para sa packaging houses sa saging,” midugang
pa si Lacierda.
Ang
detalye sa hinabang nakatakda nang ipinalisar ug giingnan na ni Presidente Aquino ang economic team, ug ang mga
hingtungdang ahensiya sa gobyerno nga magpagawas ug ilang kaugalingong plano sa
pakete sa hinabang sunod semana, nagkanayon si Lacierda.
Hinuon,
gipatin-aw ni Lacierda nga dili tanang exporter ug saging ang naapektuhan sa higpit
nga quarantine guidelines nga gipatuman sa Tsina sukwahi sa gipakatap sa pipila
ka mga kahugpungan sa mga exporter.
Ang
Pilipinas mao ang usa sa nag-unang exporter ug saging diin kadaghanan niini
ania gitanom sa Mindanao. Pipila sa nag-unang merkado sa saging mao ang Japan, South
Korea, Tsina, ug New Zealand. Niadtong 2010, ang kinatibuk-ang gikita sa pag-export
ug saging mikantidad ug 720 milyones dolyares.
Ang
Tsina mao ang ikaduhang merkado sa saging sa Pilipinas, sunod sa Japan. Ang
record nagpakita nga hangtud niaddtong Pebrero 2012, ang export sa saging
ngadto sa Tsina milangkob sa 19 porsiento sa kinatibuk-ang export sa unang duha
ka bulan niining tuiga.(ATR/PCOO/PIA9-Zambo
Norte)