By Alma L. Tingcang
MANILA, May 18 - - Si Presidente Aquino mipatin-aw sa
kamahinungdanon sa suporta sa kagamhanan ngadto sa pwersa sa kasundalohan ug
kapolisan aron maseguro ang hanas ug batid nga serbisyo ngadto sa katawhan
ingon man pagmentenar sa kahusay ug kalinaw sa nasod.
Sa iyang pakigpulong atol sa pagsalida
sa usa ka documentary sa PNP Special Action Force nga giulohan ug “Tagapagligtas”
nga didto gipahigayon sa Camp Aquinaldo, gikalipay sa presidente ang maong
pagpasalida tungod kay nagpakita kini sa positibong karakter sa mga
naka-uniporme nga magsilbing inspirasyon
ngadto sa mga Pilipino.
“Ang sama niining mga documentary magsilbing
inspirasyon aron atong buhion ang paghigugma sa atong yutang natawhan ug
magpakita kanato kung nganong adunay tugbang nga importansiya, kamatinud-anon
ug responsibilidad ang atong nasinati karon nga kagawasan,” ang presidente miingon.
“Apan magmatinud-anon kita. Walay
mahimo ang atong mga hiyas kung walay suporta nga madawat ang atong mga sundalo
ug pulis gikan sa gobyerno. Walay bili ang mga prinsipyo kung wala moanib
kanato ang katawhan. Sa tul-id nga dalan, dili lamang kita mosaad, kundili
molihok kita aron mahimong lig-on ang paghatag ug serbisyo sa tanan,” pahayag
pa sa presidente.
Gisaysay usab niya ang mga programa sa
kalamboan nga gi-implementar sa kagamhanang Aquino aron mouswag ang kapabilidad
sa atong pwersa sa seguridad.
“Busa atong gipalangga ug gipakusog ang
pwersa sa atong mga manluluwas. Alang sa atong kapolisan, nakapalit kita ug 144
jeeps sa nakalabay nga tuig, 100 patrol utility vehicles, 182 motorcycles, 500
assault rifles, 148 ka 40mm grenade launchers, ug 57 squad automatic weapons. Aron
pag-ila sa kabayanihan sa atong mga nakauniporme, gawas sa 21,800 housing units
nga gipatukod, dugangan pa nato kini ug 31,200 karong tuiga. Human ang hapit
duha ka tuig sa maayong pagpamuno, dili ba gitapos na nato ang atong kalbaryo? Karon,
ang atong mga tigpanalipod sa mga dinaug-daog, dili na kinahanglan daug-daugon,” matod pa sa presidente. (ALT-PIA9/Zambo Sur)