Pres. Aquino mi-awhag panaghiusa pagpreserbar sa “natural wonders” sa nasod

ni Alfonso T. Ruda

DIPOLOG CITY, APR.23(PIA)--- Nanawagan karon si Presidente Benigno Aquino III sa katawhang Filipinhon nga ipadayon ang panaghiusa sa pagpreserbar sa “natural wonders” sa nasod.

Ang panawagan giluwatan sa Presidente sa iyang pagpakigpulong sa opisyal nga inagurasyon sa Puerto Princesa Underground River isip usa sa pito ka bag-ong Wonders of Nature sa tibuok kalibutan didto sa One Esplanade Open Grounds sa dakbayan sa Pasay niadtong Biyernes.

Gihatagan ug punto sa Pamuno Nasod ang responsibilidad sa katawhan sa pagpreserbar sa atong palibot aron mapabilin ang natural nga katahom sa mga “world-class tourist spots” sa nasod.

“Kining maong pasidungog nakapahinumdom kanako kon unsa kabulahan ang atong nasod  ug katungdanan natong mga Filipino nga dili pasagdan kining maong mga bahandi. Magsilbi kitang magbalantay niini ug kini nagpasabot nga atong hatagan ug bili ang atong mga “natural resources” aron masiguro ang “environmental sustainability” sa atong pagpaningkamot nga molambo,” matod pa ni Presidente Aquino.

“Atong hinumdoman nga ang turismo kinahanglang atong amomahon ug ipadayon,  ug ang labing maayong paagi pahimo niini mao ang pag-atiman sa Puerto Princesa Underground River, dili lamang pinaagi sa pulong kundili labaw sa tanan pinaagi sa buhat. Ato kining panalipdan ug ipreserbar ug sigurodahon nga mapabilin niini ang talagsaong katahom, ug susamang butang usab ang atong himoon sa uban pang natural nga bahandi sa nasod,” matod pa sa Presidente.

Nakita usab sa Pamuno Nasod ang kooperasyon ug panaghiusa sa mga Filipino nga nagbutang sa PPUR isip usa sa pito ka bag-ong Wonders of Nature taliwala higpit nga kompetisyon.

“Karon naghatag kini kanato ug paglaum, dili lamang sa kalampusan sa umaabot natong pagpaningkamot nga mapalambo ang turismo sa nasod, kundili hangtud sa sa atong makanunayong pagsubay sa matarong ug tul-id nga dalan,” matod pa ni Presidente Aquino.

“Kon atong ibutang ang ingon ining trabaho nga nagdala kanato dinhi karong adlawa. Kon ang gobyerno ug ang pribadong sektor padayong magtinabangay, ipasigarbo nato ang atong nasod ug padayong himoon ang atong tagsa-tagsa ka papel, madako man o magamay, dan makasiguro kita nga ang kalampusan dili matapos dinhing dapita. Ang atong nasod padayong mobarog, malig-on ug molambo giniyahan sa mahayag nga adlaw,” matod pa sa Pamuno Nasod.

Gipasalamatan ni Presidente Aquino ang tanan sa hiniusang pagpaningkamot nga naghimo sa PPUR nga usa ka nasudnong garbo kundili garbo usab sa tibuok kalbutan.

“Akong gipasalamatan ang tanan nga misalmot niining maong paningkamot ug kadtong nangulo sa kampanya ug ilabi na gayod kadtong miuban sa pagpadala ug mga text messages ug boto sa internet. Ang Puerto Princesa Underground River garbo sa Palawan, ug karon garbo na sa tibuok kalibutan human kini opisyal nga giila isip usa sa pito ka bag-ong Wonders of Nature,” matod pa niya.

“Labaw kong gipasigarbo kining tanan gumikan sa nagkahiusang kalampusan taliwala sa higpit nga kompetisyon. Dihang miabot kita sa Finalists Round, dihay 27 pa ka laing mga finalists ug minilyon pang mga boto sa nagkalain-laing bahin sa kalibutan.Nagkahiusa kitang tanan ug atong gibutang ang Pilipinas sa mapa sa kalibutan,” dugang pa ni Presidente Aquino.

Si Presidente Aquino midawat sa plake gikan sa Presidente ug founder sa New 7 Wonders of Nature nga si Bernard Webe nga nagsignal sa opisyal nga inagurasyon sa PPUR isip usa sa New Seven Wonders of Nature sa tibuok kalibutan.

Misaksi sa maong kalihokan sila si DILG Sec. Jessie Robredo, Tourism Sec. Ramon Jimenez, DENR Sec. Ramon Paje, Presidential Communication Operations Office Sec. Herminio Coloma, ug Puerto Princesa City Mayor Edward Hagedorn.

Ang PPUR nahimutang 50 kilometros sa amihanan sa Puerto Princesa City. Aduna kiniy limestone karst mountain landscape, pipila ka chamber nga gilangkuban sa Stalactites ug stalagmites ug 8.2 ka kilometrong suba ilalom sa langub nga molahos sa West Philippine Sea. Sa gawas niini, anaa ang usa ka lagoon diin naglibot niini ang karaang mga kahoy nga mitubo sa kilid sa tubig.     

Ang uban pang naglangkob sa New Seven Wonders of Nature mao ang Amazon River sa South Africa, Halong Bay sa Vietnam, Iguazoo Falls sa Argentina/Brazil, Jeju Island sa South Korea, Komodo National Park sa Indonesia ug Table Mountain sa South Africa.(ATR/PCOO/PIA9-Zambo Norte)