ni Alfonso T. Ruda
DIPOLOG CITY, APR.10(PIA)--- Ang Malakanyang nagpahayag ug paglaum nga ang gobyerno ug Moro Islamic Liberation Front (MILF) makakab-ot ug panagsabot ug magkauyon nga ang pag-angkon ug kalinaw tali kanila makaayo sa usag-usa ug sa tibuok nasod sa kinatibuk-an.
Sa usa ka pakighinabi sa radyo DzRB Radyo ng Bayan, nga gipanag-iya sa gobyerno, gipahayag ni Deputy Presidential spokesperson Abigail Valte, nga bisan pa man sa mga sagabal sa pagkab-ot sa kalinaw uban sa MILF, naglaum gihapon ang gobyerno nga ang tanang mga pagpaningkamot ug sakripisyo makaaangkon ra ug maayong bunga sa kaulahian.
“Naglaum kami nga makakita ra kamig dalan padulong sa kasabutan sa kalinaw uban sa MILF,” matod pa ni Valte.
“Padayon lang ta(padayon natong pangitaon ang kalinaw). Mianhi kami aron matinud-anong makigsulti ug naglaum kami nga magbunga ang atong pagpursige niini,” dugang pa ni Valte.(ATR/PCOO/PIA9-Zambo Norte)
