ni Alfonso T. Ruda
DIPOLOG CITY,APR. 9(PIA)--- Nakatakdang pangunahan ni Presidente Benigno Aquino III ang usa ka Energy Summit nga ipahigayon sa Malakanyang sa ulahing bahin niining semanaha aron pagtuki sa krisis sa enerhiya nga nagresulta sa rotating blackout sa Mindanao.
Sa usa ka press briefing, gipahayag ni Deputy Presidential spokesperson Abigail Valte, nga gamiton sa Presidente ang maong kahigayonan aron molingkod uban sa mga stakeholders ug hisgutan ang mga paagi nga makatubag sa krisis sa enerhiya nga nagbunga ug hangtud sa “15 hour long power outages” sa pipila ka mga isla sa Mindanao.
“Gustong pahimuslan sa Pamuno Nasod ang kahigayonan aron makigtagbo ang tanang stakeholders ug maklaro ang isyo kabahin sa sitwasyon sa Mimdanao,” matod pa ni Valte.
Midugang pa si Valte nga tukion sa Presidente ang gisugyot nga solusyon sa gobyerno, ingon man aron usab paminawon ang mga stakeholders nga mas mapadali ang solusyon sa problema.
“Duna kitay gisugyot nga solusyon sa problema ug gikinahanglan nato ang kooperasyon sa tanang hingtungdan aron-mapatuman kining maong solusyon,” matod pa ni Valte.
Matod pa niya, naa sa ibabaw sa sitwasyon ang Department of Energy ug nakigtagbo na kini sa mga stakeholders aron maklaro ang mga isyo ug makakuha impormasyon matag karon ug unya sa plano sa Departamento ingon man ang padayong pagpaningkamot sa Aquino administrasyon nga mahatagan ug solusyon ang problema.(ATR/PCOO/PIA9-Zambo Norte)