ni Claro A. Lanipa
Pagadian City, Apr. 02 (PIA) – Ang Department of Social Welfare and Development (DSWD) mosuporta sa usa ka balaodnon nga nagtanyag sa dugang mga benepisyo ug katungod sa mga Pilipinong sentenaryo (gatusa’g panuigon).
House Bill No. 834, kon ang “Centenarian Act of 2010,” gipasaka ni Edcel Lagman, Representante sa Albay.
Matod pa sa DSWD, bisan ang mga sentenaryo nakadwat na sa mga benepisyo ubos sa Expanded Senior Citizen’s Law (RA 9994), ang paghatag ug espesyal nga pagpasidungog kanila usa ka dalayegon nga paagi.
Ubos sa maong balaodnon, mga Pilipino kinsa magsaulog sa ilang gatusan nga adlaw sa natawhan pagahatagan ug cash gift nga P100,000 ug usa ka sulat pahalipay gikan sa Presidente sa Pilipinas.
Dugang pa niini, ang ubang gilaraw’ng mga benepisyo alang sa mga Pilipinong sentenaryo gilangkoban sa dugang cash reward gikan sa kagamhanang lokal (LGUs) kon diin sila nagpuyo; 50 porsiento diskuwento ug exemption sa value added tax, (kon ikadapat), ug pagahatagan sa posthumous plaques of recognition isip pagpasidungog sa namatay’ng sentenaryo ngadto sa pinaka-duol nga paryente o sakop sa pamilya.
Ang DSWD gusto usab moduso sa dugang mga hinabang alang sa panglawas ug pagpanambal sa mga sentenaryo.
Ang balaodnon nagtuboy usab aron ideklarar ang Septyembre 25 sa matag tuig isip National Respect for Centenarians Day.
Base sa 2010 pagbanana sa National Statistics Office (NSO), adunay kapin sa 8,000 ka mga Pilipinong sentenaryo sa nasud. Ang average pang-edaron karon sa mga Pilipino anaa lamang sa 71 ka tuig. (DSWD/PIA9/CAL)
