ni Alfonso T. Ruda
DIPOLOG CITY, MARCH 24(PIA)---Si Presidente Benigno Aquino III namahayag nga milihok na karon ang gobyerno aron masulbad ang problema sa supply sa kuryente dinhi sa Mindanao.
Ang Mindanao nagkonsumo ug kuryente sobra kay sa gikontrata alang sa rehiyon busa gipalihok karon sa gobyerno ang mga barges aron masulbad ang kakulang sa enerhiya samtang giandam usab sa gobyerno ang ubang plano, matod pa ni Presidente Aquino sa iyang pagpakigtagbo kang Energy Secretary Rene Almendras didto sa Malakanyang.
Ang Presidente nakigtagbo sa Hepe sa Enerhiya aron tukion ang problema sa enerhiya dinhi sa Mindanao, kauban nila ni Executive Sec. Paquito Ochoa Jr, Presidential spokesperson Edwin Lacierda ug mga membro sa media.
Sa pagkakaron, dunay duha ka barge nga mahimong mag-operate aron madugangan ang supply sa kuryente dinhi sa Mindanao, apan hangtud niining panahona, wala pay mipirma ug kontrata aron mopalit ug elektrisidad gikan kanila.
Aron madasig ang mga tig-apod-apod ug kuryente nga mopalit ug kuryente gikan kanila, ang Presidente miingon nga kinahanglan dunay kasabutan alang sa maki-angayong pagbahin sa pagpas-an sa problema sa pagpalit ug dugang mahal nga enerhiya.
“Gawas niini, duna pay laing 5 ka power-producing barges nga mahimong mosupply ug kuryente sa Mindanao hangtud sa 2013, matod pa sa Presidente.
Nagpabarog usab ang gobyerno ug “base plants” nga posibling mahuman sulod sa 3 ka tuig aron pagtubag niining problema.
Hinuon, si Almendras miingon nga ang pagpabarog ug mga hydropower plants dili “viable” sa dugayng panahon gumikan sa nag-usab-usab nga “rainfall pattern” nga posibling maka-apektar sa operasyon niini.
Busa, matod pa niya, ang labing maayo nga suportahan lamang ang pagpabarog ug daghang coal-powered plants nga maka-prodyus ug mas baratong kuryente kon itandi sa solar o diesel-powered barges.
Matod pa ni Presidente Aquino, kinahanglang masulbad gyud ang problema sa supply sa kuryente sa Mindanao, gumikan sa naunang plano sda gobyerno nga mapasug-an ug sugang-dagitab ang 36 mil ka mga sitios karong tuiga.
Matod pa usab sa Presidenbte, iya nang gi-aprobahan ang 7 bilyones ka pesos nga reforestation fund para sa nahibiling watershed areas sa nasod para sa malungtarong operasyon sa mga hydro-power plants.
“Ang pondo maoy magsiguro nga ang mga kmunidad haduol sa watershed areas ug mga kalasangan makatanom ug daghang mga kahoy nga mapahimuslan sa hataas nga panahon.”(ATR/PCO/PIA9-Zambo Norte)