Ni Alma L. Tingcang
PAGADIAN CITY, March 28 - - - Aron maseguro ang malinawon ug husay nga eleksiyon sa sunod tuig, si Presidente Benigno Aquino III nagmando sa Philippine National Police nga hingusgan ang ilang paningkamot aron pagwagtang sa mga pribadong armadong grupo kun private armies.
Sa usa ka interview, si Presidente Aquino miingon nga ang maong mando wala lamang naglakip niadtong nailadong mga lugar sa private armies sa mga pipila ka probinsiya kundili sa tibuok Pilipinas gayud.
“Akong gimandoan, labi na ang PNP sa pagpadayong paningkamot aron pagwagtang niining mga private armies kung asa man sila namugna,” ang presidente miingon.
“Dili lamang sa Autonomous Region in Muslim Mindanao (ARMM). Molibot kita sa tibuok nasod,” dugang pahayag niya.
Ang presidente miingon nga nakigtagbo siya sa iyang gabinete ug mga ahensiyang nagpatuman sa balaod aron pag-assess ug pag-revalidate sa ilang mga impormasyon kalabot sa mga pribadong armadong grupo ug unsaon pagsulbad kining maong kahimtang. (ALT/PCOO/PIA9-Zambo Sur )
