ni Alfonso T. Ruda
DIPOLOG CITY, MARCH 26(PIA)--- Si Presidente Benigno Aquino III subling mipasalig sa paghatag sa gikinahanglan sa mga pulis, guwardiya sa mga bilangguan ug mga bombero aron epektibo nilang matuman ang ilang gipanumpaang katungdanan.
“Sama sa akong gisaad kaninyo, napabarog nato ang 21,800 ka mga balay para sa mga pulis ug sundalo niadtong 2011 sa papanguna sa National Housing Authority, Kanang maong programa magpadayon, diin karong tuiga, plano natong tukuron ang 31,200 pa ka mga balay,” matod pa ni Presidente Aquino sa iyang mensahe ngadto mga migradwar sa Philippine National Police Academy karong tuiga.
Lakip sa makabenepisyo sa programa sa pabalay mao ang mga elemento sa Philippine National Police(PNP); Bureau of Jail Management and Penology (BJMP) ug Bureau of Corrections sa tibuok nasod..
Sa samang higayon, gitutukan usab karon sa gobyerno ang paghatag ug pagbansay-bansay ug ekipos sa mga membro sa PNP, BJMP, ug BuCor.
“Karong tuiga, kung wala lay katalagman, plantsado na ang tanan alang sa paghatag ug pagpalit ug personal protective equipment para sa mga bombero, ug dugang pusil alang sa kapulisan,” matod pa ni Presidente Aquino.
Niadtong miaging bulan, gipangunahan mismo ni Presidente Aquino ang pagturn-over ngadto sa Armadong Kusog sa Pilipinas sa 1,500 ka mga balay para sa peronahe sa AFP ug Philippine National Police SA Trece Martires, Cavite.
Ang turn-over maoy tipik sa ksaulogan sa ika-26 ka tuig nga anibersaryo sa 1986 EDSA People Power Revolution.
Ilalom sa maong programa sa pabalay, ang matag benepisyaryo magbayad ug 200 pesos matag bulan sa unang lima ka tuig nga pagpuyo nila sa maong pinuy-anan.(ATR/PCOO/PIA9- Zambo Norte)