ni Alfonso T. Ruda
DIPOLOG CITY, MAR 2(PIA)--- Aron paglig-on sa iyang commitment nga i-improve ang basic education sa nasod ug mapahimuslan kini sa mga Filipinhon, naggahin karon si Presidente Benigno Aquino III ug 2.39 bilyones ka pesos ilalom sa 2012 General Appropriations Act aron isuporta sa bag-ong napasar nga Akta Republika numero 10157 nga mas naila isip Kindergarten Education Act.
“Karon nga napahimutang na ang kindergarten Law, mahatagan na nato ug mas malig-ong pundasyon ang mga kabataang Filipinhon para sa scholastic excellence ug achievements. Siyempre, ang balaod nagkinahanglan ug pondo para sa episyenteng implementasyon niini. Kini gitubag sa administrasyong Aquino pinaagi sa pag-pagawas sa pondo nga gigahin para isuporta sa bag-ong balaod,” matod pa ni Budget Secretary Florencio “Butch” Abad.
Ang 2.39 bilyones ka pesos tipik sa pahat nga 238.8 bilyones ka pesos nga pondo para sa basic education, gipagawas pinaagi Agency Budget Matrix, wa pa modangat ang bulan sa Enero 2012. Ang sayong pagpagawas sa maong pondo makatabang ug dako aron episyenteng mapatuman ang Universal Kindergarten Law sa tuig tingtungha 2012-2013.
Matod pa ni Abad, ang alokasyon para sa Universal Kindergarten Law sa 2012 mas taas kay sa pahat para sa kindergarten education nga nagkantida lamang ug 2.34 bilyones ka pesos niadtong 2011.
Ilalom sa Kindergarten Education Act, ang mga batang Filipino nga nagpangidaron ug gikan 5 anyos pataas, kinahanglang moagi una ug Kindergarten sa dili motungha sa Grade I. Ang implementasyon niining bag-ong balaod sa tanang pampublikong tunghaan makatabang sa mga kabataan pag-andam sa ilang kaugalingon sa di-pa sila motungha sa elementarya.
“Determinado ang Presidente nga tumanon ang Millenium Development Goals , partikularmente ang paghatag ug de-kalidad nga edukasyon sa tanan pag-abot sa tuig 2015. Ang pagpasar sa Universal Kindergarten Law nagpalig-on lamang sa plataporma sa administrasyong Aquino para sa poverty reduction ug sustained economic growth, ingon man pag- edukar sa atong mga kabatan-onan,” matod pa ni Abad.
Ang Departamento sa Edukasyon, miangkon ug dakong bahin sa pahat para sa serbisyong sosyal para sa 2012 nga gilangkuban sa 31.7 porsiento kon 575.8 bilyones ka pesos sa kinatibuk-ang GAA sa 2012. Ang pahat sa DepEd karong tuiga gipadak-an ug 15.2 porsiento kay sa pahat niini niadtong 2011, sa tinguhang mapalambo ang serbisyo sa edukasyon sa nasod. (ATR/PCOO/PIA9-Zambo Norte)