ni Alfonso T. Ruda
DIPOLOG CITY, MARCH 29(PIA)---Gi-awhag karon ni Presidente Benigno Aquino III ang mga Filipino nga padayong pamatud-an sa tibuok kalibutan ang ilang katakos isip “excellent workforce” pinaagi sa hingpit nga paggamit sa ilang potensyal aron makab-ot ang gidamgo sa administrasyong Aquino nga malungtarong kalambuan ug mas dakong tahas sa pagpabarog ug balik sa nasod nga Filipinhon.
Sa iyang pagpakigpulong sa inagurasyon sa Hewlett Packard (HP) Executive Briefing Center and Mission Control Center, sa ika-doseng andana sa Intellectual Property Center Building nga nahimutang sa Upper Mckinley Road, Mckinley Hill Town Center, Fort Bonifacio sa Taguig City kagahapon, ang Presidente miingon nga ang naangkong propisyonalismo ug positibong hiyas sa matag Filipino maoy nag-aghat sa mga dagkong kompaniya sama sa HP nga ilakip ang mga Pinoy sa ilang “competitive workforce.”
“Sa mga Filipinong nagtrabaho dinhi, atong padayong pamatud-an sa mga kompaniyang sama sa Hewlett Packard nga ensakto ang ilang disisyong pagbutang ug patigayon dinhi sa Pilipinas… nga nagsugod na ug buka ang mga mata sa kalibutan ug ilan nakita nga kon unsa kadako ang kalampusan nga nakab-ot sa atong nasod para atong kaugalingon ug sa atong mga partners, mas labawng mahinungdanon nga magtrabaho kita matag adlaw ug ibutang sa atong pagpaningkamot nga bisan unsa kagamay, dunay matampo ang usa ka tawo padulong sa mas dakong tahas nga mao ang pagpabarog ug balik sa atong nasod,” matod pa ni Presidente Aquino.
“Ang atong mga kaigsoonan kanunay nga mangitag dalan nga mahimong episyente ang ilang trabaho… pagsulbad sa ilang problema sa posibling labing maayong paagi ug paghimo niini uban ang mapahiyumong dagway…. Nagtoo ako nga ang atong mga kaigsoonan makahimo ug nagdala na ug dakong papel sa pagpalig-on sa korporatikanhong kultura. Siguro, kini ang hinungdan kon nganong ang Hewlett Packard miingon nga ilang nadoble ang gidaghanon sa mga Filipino sa ilang workforce sukad niadtong Septyembre 2010,” midugang pa ang Presidente.
Gihagit usab sa Presidente ang Hewlett Packard nga dugangan ang ilang patigayon dinhi sa nasod ug padayong maghatag ug ekonomikanhong kahigayonan sa mga Filipino nga padayong mipasalig kanila ug malig-ong palibot sa patigayon uban ang repormang gipatuman sa kagamhanan.
“Tingali, sa umaabot nga mga adlaw, inyong ikonsidera ang pagpalapad sa inyong patigayon ug pagkuha sa mga Filipino nga inyong empleyado. Ako karong ipasalig kaninyo nga sigurohon sa atong gobyerno nga ang Hewlett ug ubang mga kompaniya, magamay man o madako, padayong makakita ug malig-on ug siguradong palibot sa patigayon dinhi sa Pilipinas,” matod pa ni Presidente Aquino.
Lakip sa mga mitambong sa inagurasyon sa Hewlett Packard mao sila si Trade and Industry Secretary Mark Gregory Domingo; HP Philippines Managing Director Ryan Quadalquiver ug HP Growth Markets Organization Senior Vice Pres. Brian Humphries ug daghan pang uban.
Sa samang okasyon, gibuksan usab sa Hewlett Packard ang 2 ka state-of the-art facilities sa nasod nga mao ang HP Mission Control and Customer Experience ug ang HP Executive Briefing Center.
Ang bag-ong kapabilidad maoy maghatag sa gikinahanglang kasayon sa pagpadagan sa aplikasyon ug serbisyo nga anaa kanunay ug daling makasagop sa mga bag-ong oportunidad samtang paspas nga nausab ang teknolohiya nga motubag sa nagbag-ong panginahanglan.(ATR/PCOO/PIA9-Zambo Norte
