ni Claro A. Lanipa
Pagadian City, Feb. 19 (PIA) – Nalipay si Social Welfare and Development Secretary Corazon Juliano-Soliman sa resulta sa pagtuon nga gihimo ni Dr. Rosario Manasan, senior research fellow sa Philippine Institute for Development Studies (PIDS) diin mipakita kini ug kausbawan sa school enrollment sa mga lugar sakop sa Pantawid Pamilyang Pilipino Program.
Ang Pantawid Pamilyang Pilipino mao ang programa sa kagamhanan kon ang gitawag conditional cash transfer (CCT) program nga giimplementar sa DSWD.
Ang pagtuon gihimo sa Set 1 nga mga lugar, diin mao kini ang unang expansion phase nga giimplementar sa maong programa gikan sa Marso hangtod Disyembre 2008. Ang Set 1 gilangkoban sa 342,960 ka mga pobreng pamilya sa 160 ka mga lungsod ug siyudad sa 20 ka mga pinaka-pobreng probinsya (base kini sa 2006 Family Income Expenditures Survey) ug tulo ka mga probinsya sa Autonomous Region in Muslim Mindanao (ARMM).
Matod pa sa pagtuon, ang growth rate sa ihap sa mga tinun-an sa mga pampublikong tulunghaan sa elementarya sa Set 1 nga lugar misaka gikan sa 0.6 porsiento sa 2004-2007 ngadto sa 3.5 porsiento sa 2008-2010.
Sa ingon usab, ang ihap sa mga tinun-an sa pampublikong tulunghaan sa sekondarya sa susamang mga dapit mipakita usab kausbawan gikan sa 0.5 porsiento sa 2004 - 2007 ngadto sa 3.5 porsiento sa 2008 - 2010.
Si Secretary Soliman miingon nga ang positibong resulta sa maong pagtuon naghatag ug dakong pagtuboy sa hingpit sa desisyon ni Presidente Benigno Aquino III aron sa pagpadayon sa programa ug gane gipalapdan pa kini pinaagi sa paggahin ug P34.4 bilyon sa pondo sa DSWD sa 2012 aron moapil ang dugang 700,000 ka mga pamilya. Sa katapusan sa 2012, household beneficiaries sa Pantawid Pamilya program mikabat na sa 3 milypn gikan sa 2.3 milyon sa 2011.
Ang Pantawid Pamilya usa ka social development ug poverty-reduction strategy nga nagtanyag sa hinabang pinansyal ngadto sa mga pinaka kabus nga pamilya aron makab-ot nila ang gitawag human development goals sama sa maayong panglawas, nutrisyon ug edukasyon, sa ingon usab, motuman sila sa mga kondisyones sa maong program.
Ang Pantawid Pamilya nagtanyag sa educational grants sa matag pamliya kon P300 matag anak 6 hangtod 14 anyos ang pang-edaron, (kutob sa tulo ka mga kabataan) ug kinahanglan motuman sila sa mga kondisyones nga ilang ipadala ang mga kabataan sa eskuwelahan ug moapil sa klase sa dili mominus sa 85 porsiento sa attendance.
Sa kasamtangan, ang Pantawid Pamliya adunay 3,029,890 ka mga pamliyang benepisiyaryo kon 7,557,321 ka mga kabataan sa 79 ka mga probinsya ug 1,260 ka mga lungsod sa tibuok nasud. (DSWD/PIA9/CAL)