ni Alfonso T. Ruda
DIPOLOG CITY, MAR. 8(PIA)--- Kompiyansa ang Malakanyang nga mahatagan ug trabaho sa administrasyong Aquino ang mga mogradwar karong tuiga, base sa kadaghan sa mga kompaniyang langyaw nga nagpahayag ug interes nga mobutang ug patigayon dinhi sa Pilipoinas.
Sa regular nga press briefing sa Malakanyang kagahapon, si Presidential Spokesperson Edwin Lacierda nagkanayon nga daghang mga negosyante ang intresadong mosulod sa nasod nga gilaumang magmugna ug trabaho sa manufacturing sector.
“Pipila niining maong mga manufacturing firms nga gikan sa nasod sa Japan, Tsina, ang nagplanong magbutang ug manufacturing sites dinhi sa Pilipinas…. Daghang mga magpapatigayon ang nagplanong magbutang ug shop dinhi sa nasod ug atong nakita ang daghang trabaho sa manufacturing sector… daghan pang nagpakita ug interes nga mosulod dinhi sa nasod,” matod pa ni Lacierda.
May kalabutan niini, matod pa ni Lacierda, gimanduan na ni Presidente Benigno Aquino III ang mga hingtungdang ahensiya sa gobyerno nga magpahigayon ug makuting pagtoon aron masiguro nga ang katakos sa katawhan motukma sa gikinahanglang trabaho.
“Uban sa pagpanumbalik sa ilang interes sa Pilipinas, kompiyansa kami nga makahatag kita ug trabaho sa mga mogradwar karong tuiga. Sa taas nga termino, importante nga ato usab nga sigurohon nga ang mga kursong atong itanyag makahatag ug trabaho sa atong mga mogradwar sa mga industriya diin sila gikinahanglan. Sa bahin sa mga gikinahanglang vocational skills, amo na kining gihimo sa panabang sa TESDA,” matod pa ni Lacierda.
“Magpadayon kini, ang kahigayonan sa trabaho anaa, ug padayon kitang mohatag niini. Ang problema lang mao ang pagtukma sa trabaho ug sa katakos. Maoy hinungdan nga ang Department of Labor and Employment gitahasan nga mohimo ug regular nga pagtoon sa jobs-skills matching ug gitahasan usab ang TESDA nga mohatag gilayon human sa gradwasyon sa sekondarya sa mga katakos nga motukma sa gikinahanglang trabaho sa pagkakaron,” panapos pa ni Lacierda.(ATR/PCOO/PIA9-Zambo Norte)
