Ni Alma L. Tingcang
PAGADIAN CITY, March 26 - - -Nanawagan ang Malacanang sa katawhang Pilipino nga moduyog pagtabang sa Department of Tourism (DOT) aron makab-ot niini ang tourist arrivals target nga 4.6 million bisita alang sa tuig 2012.
Sa usa ka press briefing sa DZRB Radyo ng Bayan kagahapong adlawa, si Deputy Presidential Spokesperson Abigail Valte miingon nga ang tanang Pilipino kinahanglan motabang sa kagamhanan nga makab-ot ang maong tumong tungod kay makabenepisyo man ang tanan pinaagi niini.
Siya miingon nga bisan simpleng pagtabang dako kaayo ug kahimoan alang sa miduaw nga langyaw’ng bisita aron mahimong makalingaw ug dili nila mahikalimtan ang ilang pagduaw sa atong nasod..
“…Kung kami ang pangutan-on, dili lamang ang kagamhanan makahimo nga ang pagbisita sa mga turista dinhi sa Pilipinas mahimong halandumon ug makalipay kundili ang kontribusyon sa matag usa ka Pilipino,” si Valte miingon.
“Pwede bisan simpleng paghatag lamang ug hustong direksiyon ngadto sa mga turista o kaha pagpahiyom o pagtabang kanila kung asa sila gustong moadto, matag usa kanato adunay ikatabang,” dugang pahayag ni Valte.
Si Valte miingon nga sumala sa taho sa DOT, sa Enero 2012 lamang, adunay 411,064 turista nga nagrepresentar ug 17.6% increase gikan sa susamang panahon sa nakalabay nga tuig, nga nakabisita na sa nasod.
Kumpiyansa siya nga pinaagi sa pagtabang sa katawhan, malahutay sa kagamhanan kining maong record ug makab-ot niini ang tourist arrivals target alang sa 2012.
Hinumdomi nga “It’s more fun in the Philippines” ug kinahanglan maghiusa kita alang sa kalingawan dinhi sa Pilipinas…ug kitang tanan ang mabulahan kung makab-ot nato ang target sa DOT nga 4.6 milyon nga bisita ning tuiga, matod ni Valte.
“Hinaut nga kitang tanan molihok aron himoong makahuluganon ug makalipay ang pagbista sa mga langyaw dinhi sa atong nasod,” panapos nga pahayag ni Valte.(ALT/PIA9-Zambo Sur)