ni Alfonso T. Ruda
DIPOLOG CITY, MARCH 18, 2012--- Padayon ang gihimong pagpaningkamot karon sa gobyerno nga makakuha ug labing kwalipikadong mga empleyado, sa samang higayon, matupngan ang mga benepisyong gihatag sa pribadong sektor sa ilang mga empleyado.
“Niadtong Disyembre 2011, akong giisyo ang Memorandum Order No. 25 nga nagmugna sa Inter-Agency Task Force nga magsugyot ug results-based performance management system nga gamiton sa gobyerno pag-ila sa mga insentibo nga ihatag sa mga empleyado sa gobyerno base sa ilang binuhatan,” matod pa ni Presidente Nenigno Aquino III, sa iyang pagpkigpulong atol sa pagsaulog sa ika-20 ka tuig nga anibersaryo sa Association of Young Filipino-Chinese Chinese Entrepreneurs sa Makati City.
“Ilalom sa liderato sa Department of Budget and Management, ang Departamento sa Panalapi ug uban pang ahensiya sa gobyerno nga membro niining maong task force padayon karong nagtrabaho sa proposal nga nagkinahanglan ug makuting pagtoon.”
Sumala pa sa Presidente, nga dihang membro pa siya sa kongreso, iyang giduso ang usa ka balaodnon nga nagrequire sa mga kompaniya nga magkuha ug 10 porsiento sa ilang ginansiya para sa ilang mga empleyado.
Namatikdan usab sa Presidente, diha pa lang sa pagsulod sa mga empleyado sa gobyerno ug sa pribado, halos magkapareho lang ang ilang suweldo. Apan samtang misaka ang posisyon sa mga empleyado sa gobyerno, ang ilang suweldo gamay ra kaayo kon itandi sa mga empleyado sa pribadong sektor nga naghupot ug susamang posisyon.
“Ang kalambuan sa nasod nagsalig ug dako sa mga nagtrabaho sa gobyerno, ug ang gobyerno kinahanglang makadani ug , ingon man maghatag ug ganti niadtong mga maayong laki sa nasod. Kini ang hinungdan kon nganong mihimo ako ug unang lakang nga himoong competitive ang suweldo sa mga empleyado sa gobyerno ug mahatagan ug pasidungog ang 1.6 milyones ka mga trabahante sa atong kagamhanan,” matod pa ni Presidente Aquino.(ATR/PCOO/PIA9-Zambo Norte)