ni Claro A. Lanipa
Pagadian City, Mar. 29 (PIA) – Ang Department of Social Welfare and Development (DSWD) mosuporta sa balaodnon nga nagtanyag sa espesyal pagpanalipod ug seguridad ngadto sa mga ginikanan, lakip ang mga senior citizens ug mga tigulang gikan sa ekonomikanhong pag-abuso ug nagantos sa kalisud pinansyal tungod kay gibiyaan ug gipasagdahan sila sa ilang mga anak o apo.
House Bill No. 2295, kon “The Maintenance and Welfare of Parents, Senior Citizens, and Elderly Act of 2010” nga gipasaka ni Party-List Congressman Godofredo Arquiza. Si Arquiza mao ang Vice-Chairperson sa Committee of Social Services and Veterans Affairs and Welfare sa Kamara.
Ang DSWD miingon, nga ilang giduso ang ilang rekomendasyon ngadto sa Committee on Population and Family Relations aron sa pagtuboy pa gayud ang balaodnon sama sa pag-apil sa probisyon kon unsaon sa pagdumala sa kaso sa pamilya sa mga social workers aron sa pagtantiya sa relasyon ug kapabilidad sa mga indibiduwal sa dili pa pasakaon sa kaso.
Girekomendar usab sa DSWD nga ang Public Attorney’s Office maoy motanyag sa serbisyo legal sa mga reklamo nga ipasaka sa mga tigulang (elderly) ug mga senior citizens.
Dugtong pa, ang DSWD gusto nga ipaapil ang usa ka probisyon alang niadtong mopasaka ug kaso aron motabang sa mga ginikanan, tingulang o senior citizens sama sa DSWD ug lokal nga social workers o kaha duha ka hingtungdan responsableng tawo sa siyudad o lungsod diin ang ginikanan, tingulang o senior citizen nga nagkinahanglan ug suporta nga nagpuyo.
Ang balaodnon mibutyag nga daghan sa mga kabataan karon, pagkahuman gipadako, gimahal, giamoma ug gipadala sa eskuwelahan sa ilang mga ginikanan, sa hingpit mi-abandonar ang ilang mga kinikanan sa walay igong rason. (DSWD/PIA9/CAL)
