Ni Alma L. Tingcang
PAGADIAN CITY, March 30 - - - Si Presidente Benigno Aquino III midumili sa laraw sa Kongreso paghatag kaniya ug emergency powers aron pagsulbad sa power situation sa Mindanao ug miingon nga dili kini kinahanglan.
Sa usa ka interview human sa inagurasyon sa Philippine Expeditionary Force to Korea (PEFTOK) Korean War Memorial Hall sa Taguig City kagahapon, ang presidente miingon nga ang kagamhanan nagalihok aron mapadali ang pagrelease sa gikinahanglan nga permit aron pag-establisar sa coal fire powered plant sa lugar.
“Mopatindog kita ug coal fire plant nga maoy pinakakusog nga molungtad ngadto sa 2 o tulo ka tuig. Tipik sa maong proseso mao ang pagkuha ug local government authority aron pagtindog niining maong planta; environmental compliance certificate; ug public dialogues. Nalangan ang konstruksiyon sa power plant tungod kay ang duha ka kompanya nga maoy motukod niini dugay kaayo nakakuha sa gikinahanglang permit nga mikabat ug sobra sa usa ka tuig,” ang presidente miingon.
Nasubo siya sa kalangay sa pag-release sa permits tungod kay nasugdan na unta ang konstruksiyon sa planta nga motagbo na unta sa panginahanglan sa enerhiya sa maong dapit.
“…kadtong pagkalangan ug usa ka tuig pagproseso sa mga permits nga gikinahanglan nahimo na untang usa ka tuig nga gigugol sa konstruksiyon aron makuha ang added generating capacity niining duha ka coal-powered plants, nga subo palandungon pagasugdan pa lamang tungod sa kalangay sa pagproseso sa mga permit,” pahayag sa presidente.
‘‘Busa naningkamot kami nga mapadali ang proseso samtang gikonsiderar usab namo ang mga kabalaka sa mga naapektohan,” ang presidente namulong. (ALT/PIA9-Zambo Sur)
