ni Alfonso T. Ruda
DIPOLOG CITY, FEB. 9(PIA) --- Si Presidente Benigno Aquino III, mimando sa Department of Public Works and Highways nga maghimo ug bag-ong desinyo ug magpahigayon ug hinanaling pagpabarog ug balik sa nangagubang mahinungdanong inprastaktura aron mapadayon ang kalihokang ekonomikanhon sa mga lugar nga naka-angkon ug dakong kadaot gumikan sa 6.9 magnitude nga linog nga mitay-og sa Negros Oriental, niadtong Lunes (Pebrero 6, 2012).
Sa samang higayon gusto usab ni Presidente Aquino nga mapatunhay ang kahusay ug kalinaw aron mapabilin sa normal nga level ang presyo sa mga produktong dad-on sa mga lugar nga na-apektahan sa linog.
Sa iyang pagbisita sa mga apektadong lugar sa Negros Oriental atol sa pagsaulog sa ika-52 ka tuig nga kasumaran sa iyang adlawng natawhan. Partikular nga gibisita sa delegasyon ni Presidente Aquino, ang dakbayan sa Guihulngan ug lungsod sa La Libertad, duha ka lugar nga nakaangkon ug dakong kadaot gumikan sa maong linog.
Sa samang higayon, mag-imbentaryo usab ang gobyerno sa mga pangpubliko ug pribadong inprastaktura aron masuta kon nagsunod ba kini sa building code sa nasod nga kinahanglang makabarog bisan pa man sa 7.2 magnitude nga linog, sumala sa gitakda sa balaod.
Ang labing ulahing taho nga nadawat gikan sa Kagamhanang-Probinsyal sa Negros Oriental nagpakita nga 26 ka tawo ang kompirmadong namatay, samtang 50 ang nagpabiling wala igkita. Ang maong linog nagresulta usab sa gibana-banang 665 milyones ka pesos nga kadaot sa inprastaktura ug naka-apektar sa ekonomikanhong kalihokan sa lugar.(ATR/PIA9-Zambo Norte)