DIPOLOG CITY, FEB. 6(PIA)--- Gi-aksyonan na sa Armadong Kusog sa Pilipinas tanang kaso sa paglapas sa tawhanong katungod nga gikalambigitan ug mga sundalo.
Mao kini ang gipahibalo ni Colonel Domingo Tatuan Jr., Hepe sa AFP Human Rights HROOffice ngadto kang Carlos H. Conde, representante sa Human Rights Watch for Asia Division nga nakabase sa New York sa Estados Unidos sa gipahigayong briefing didto sa Malakanyang niadtong Biyernes, Pebrero 3,2012.
Sumala pa ni Tatuan, giaksyonan na sa AFPHRO ang nadawat nga ug dokumentadong 59 ka mga reklamo sa paglapas sa tawhanong katungod nga binuhatan sa mga sundalo.
Niadtong Hulyo 201, gimantala sa organisasyon nga nakabase sa Estados Unidos ang taho nga naghisgot sa 7 ka kaso sa paglapas sa tawhanong katungod nga giingong gikalambigitan sa mga personahe sa AFP.
Ang report gipasikad sa HRW sa pagpakighinabi nga gihimo sa 11 ka mga lalawigan sa nasod.
“Nalakip kini sa among Internal Peace Security Plan (IPSP) nga isip mga tigpanalipod sa katawhan, kinahanglang amo usab nga i-promote ang pagpanalipod sa tawhanong katungod ug pagsunod sa International Humanitarian Law. Kini ang hinungdan kon nganong padayong gipalig-on sa AFP Human Rights Office nga nadala hangtud sa level sa battalion ang pagtubag sa mga kasong may kalabutan sa tawhanong katungod,” matod pa ni AFP Chief of Staff, Lt. Gen. Jesse Delllosa.
Matod pa ni Tatuan, nakigsulti na ang AFPHRO nila ni Jessica Evans ug Elaine Pearson aron ilang ipresentar ang mga ebidensiya may kalabutan sa maong kalapasan alang sa mas lawom nga imbestigasyong himoon sa AFP.
Dugang pa ni Tatuan nga sa gihimong imbestigasyon, ang duha ka sundalong giingong nalambigit sa nahitabong pagpatay didto sa Negros Occidental niadtong Hunyo 2010, gidakop na sa mga otoridad ug gipasakaan na ug kaso sa hukmanan.
Ilalom sa Rule 110 sa Rules on Criminal Procedure, magsugod lang ang prosekusyon kon ang pormal nga reklamo o gipanumpaang pahayag sa nagreklamo gisang-at na sa hingtungdang otoridad.
Matod pa ni Tatuan, sanglit wala may pormal nga reklamong giduso may kalabutan sa mga kasong nahisgutan sa HRW, mao nga wala pa usab masugdi ang prosekusyon.
“Nagsunod lang kami sa military justice system apan ang AFP dili usa ka prosecutory body. Ang amo lang mahimo mao ra gyud ang pagpahamtang ug disciplinary action sama sa pagpalagpot gikan sa serbisyo sa military ug pagkuha ug mga benepisyo. Apan sa higayong mawala na sa serbisyo ang nalambigit nga sundalo, ang sibilyang hukmanan na ang dunay katapusang disisyon niini,” matod pa ni Tatuan
Alayon niini, nanawagan si Tatuan sa HRW nga makigtinabangay sa AFP alang sa kasulbaran sa mga kasong may kalabutan sa pagpang-abuso ug paglapas sa tawhanong katungod. (ATR/PIA9/Zambo Norte)