Ni Alma L. Tingcang
PAGADIAN CITY, February 5 (PIA) - - Ang Palasyo misuporta sa proposal ni Senador Rafael Recto kinsa mihangyo sa Civil Service Commission (CSC) nga magpahigayon ug nasudnong kampanya ngadto sa tanang ahensiya sa gobyerno alang sa hustong pag-file sa bag-ong statement of assets, liabilities and net worth kon SALN.
“Maayo kining proposal gikan kang Senador Recto. Gani nakadawat kami ug memorandum gikan sa Civil Service Commission kabahin sa bag-ong porma sa SALN ug adunay gamay nga talamdan kung unsaon kini pag-fill up,” si Deputy Presidential spokesperson Abigail Valte miingon sa usa ka radio interview sa dzRB Radyo ng Bayan kagahapon kabahin sa pamaagi sa hustong pag-file ug SALN.
Siya miingon nga nakita niya ang kopya sa nasangpit nga memorandum nga gi-isyu ni CSC Chairman Francisco Duque niadtong nakalabay nga semana nga naghisgot bahin sa bag-ong porma ug guide aron sa pagfill-up sa porma.
Ang pag-file sa SALN sa tanang opisyal sa kagamhanan nahimong usa ka nag-unang concern human nag-file ug kasong impeachment ang mga kaalyado sa presidente didto sa Kongreso batok kang Chief Justice Renato Corona sa wala niya pag-file ug SALN ug uban pang kaso. (ALT-PIA9/Zambo Sur)
