ni Alfonso T. Ruda
DIPOLOG CITY, FEB. 25(PIA)--- Gibutyag kagahapon ni Presidente Benigno Aquino III ang nagkalain-laing programang pangkalambuan sa iyang administrasyon para sa Armadong Kusog sa Pilipinas ug Philippine National Police.
Sa iyang pagpakigpulong atol sa symbolic turn-over sa 1,500 ka mga balay para sa mga personahe sa AFP ug PNP sa Ciudad Adelina 2, Barangay Luciano sa Trece Martirez sa lalawigan sa Cavite, si Pres. Aquino nagkanayon nga matinud-anon ang gobyerno sa pagpalig-on sa kapabilidad sa pulis ug militar.
Kini gipamatud-an pinaagi sa 28 bilyones ka pesos nga gigahin sa gobyerno para sa maong programa nga halos katumbas sa kinatibuk-ang pahat nga nagahin sa nangaging mga administrasyon sa nakalabayng 15 ka tuig.
“Pinaagi sa atong pagpaningkamot, nahatod nato ang 28 bilyones ka pesos sulod lamang sa 17 ka bulan… wala man nato matubag diha-diha ang kakulangan sa inyong grupo, makalaum kamo nga padayon na ang paglambo sa inyong kapabilidad ug kagamitan,” matod pa sa Presidente sa pinulungang Pilipino.
Gitaho usab sa Pamuno Nasod ang paghidangat sa upat sa walo ka mga bag-ong combat utility helicopters para sa Philippine Air Force nga gipalit sa gobyerno gikan sa Poland.
Para sa PNP, mipalit usab ang gobyerno ug mga bag-ong patrol vehicles ug mga tag-as nga kalibre sa armas.
“Alang sa kapulisan, nadawat na usab ninyo ang 140 ka mga patrol jeeps, 100 ka mga patrol utility vehicles; 180 ka mga motorsiklo ug mga tag-as nga kalibre sa armas… gipakuha usab ug kurso sa pampublikong kaligtasan ang 500 ka mga non-commissioned officers aron mahasa ang ilang katakos, motibasyon ug paghatag ug bili sa ilang katungdanan,” matod pa sa Presidente.
Sa maong okasyon usab ang uban pang dagkong opisyal sa gobyerno, sama nila ni Bise-Presidente Jejomar Binay, Defense Secretary Voltaire Gazmin, Presidential Communications Operations Office (PCOO) Secretary Herminio “Sonny” B. Coloma Jr., National Housing Authority (NHA) General Manager Chito Cruz, Cavite Vice Governor Recto Catimbuhan, Trece Martires Mayor Melandres de Sagun and Edsa People Power Commission (EPPC) Commissioners Cesar Sarino ug Milagros Kilayko. (PCOO/ATR/PIA9-Zambo Norte)