ni Alfonso T. Ruda
DIPOLOG CITY, FEB. 22(PIA)--- Sa tinguhang hatagan ug katumanan ang damgo sa iyang administrasyon nga mahimong supisyente sa pagkaon ang nasod, gihingusgan karon ni Presidente Benigno Aquino III ang kampanya alang niini.
Kini gihimo sa Presidente pinaagi sa pagpadako sa pahat sa Department of Agriculture ug Department of Agrarian Reform ngadto sa 99.6 bilyones ka pesos karong tuiga, nga mas taas ug 51 porsiento kay sa 65.97 bilyones ka pesos nga alokasyon sa ahensiya niadtong miaging tuig.
“Ang Presidente miila dili lamang sa agrikulturanhong bahandi sa nasod, kundili hangtud na ang paggamit niining maong mga bahandi para sa kaayuhan sa katawhan. Ang paggahin sa pondo idugang sa pondong una nang gigahin sa gobyerno para sa self-sufficiency sa produksyon sa pagkaon, ug pagtubag sa nasudnong problema sa kagutom,” matod pa ni Budget Secretary Florencio “Butch” Abad.
Sa kinatibuk-ang alokasyon, dili moubos sa 24.5 bilyones ka pesos ang gamiton para isuporta sa mga proyektong inprastaktura sa irigasyon; lakip na ang konstruksyon ug rehabilitasyon sa mga irrigation systems sa nasod. Ang alokasyoin mas taas ug 90 porsiento kay sa gahin alang niini sa gisundan nga tuig.
Samtang sa laing bahin, laing 5 bilyones ka pesos usab ang gamiton para sa paghimo ug pagpaayo sa 1,718 ka kilometrong farm-to-market roads aron mapalapdan sa lokal nga komunidad ang merkado sa ilang produkto ngadto sa mga silingang dakbayan ug kalungsuran.
“Tipik sa among gihimo aron magarantiyahan ang food self-sufficiency mao ang paghatag ug gahum sa mga mag-uuma ug komunidad aron mahimo silang mas aktibong partisipantes sa lokal nga merkado. Ang inisyatibong pang-inprastaktura ilalom sa nasudnong budget sa 2012 maoy makadugang sa kita sa agrikultura ug maghatag pagtugot sa mga mag-uuma ug igu-igong abot nga direktang ikabaligya sa lungsod,” matod pa ni Abad.
Dugang pa niini, misaka usab ang pondo para sa National Rice Program ug 43.21 porsiento nga maoy nagdala sa kinatibuk-ang pahat ngadto sa 6.1 bilyones ka pesos.
Ang programa gilaumang magprodyus ug 19.2 milyones ka metriko toneladang bugas ug ma-abot ang target nga 5.6 milyones ka metriko tonelada para maabot ang sufficiency rate nga 91.87 porsiento.
Ang National Fisheries Program nakadawat usab ug 1.9 bilyones ka pesos aron gamiton pag-abot target sa 2012 nga 5.6 metriko toneladang commercial, municipal ug aquaculture products .
Samtang sa laing bahin, ang National High Value Crops nakakuha usab ug 1.3 bilyones ka pesos, nga mas taas ug 44.2 porsiento kay sa pahat sa miaging tuig. Kini aron suportahan ang gasto sa pagtanom ug mga utanon, ug uban pang mga lagutmon, ingon man pagpalit ug kahimanan sa panugma ug mga makinarya.
Ang alokasyon sa livestock production, ilalom sa National Livestock Program makakuha usab ug 50.2 porsiento nga usbaw, uban ang 1.02 bilyones ka pesos nga gigahin sa self-sufficiency program.
Sa samang higayon ang National Corn Program nakakuha usab ug dugang pondo nga 95.1 milyones ka pesos, nga mas taas ug 96.5 poirsiento kay sa pondo niini niadtong 2011.(ATR/PIA9-Zambo Norte)