DIPOLOG CITY, JAN.4(PIA)---Sanglit dili naman gyud mapugngan ang paglugway sa Basic Education Curriculum gikan sa 10 ngadto sa 12 ka tuig sugod sunod tuig-tingtungha, ang mga representante sa mga pribadong tunghaang-katoliko sa nasod nga membro sa Catholic Education Association of the Philippines ang nakatakdang magpahigayon ug nasudnong summit karong Enero 12 aron pangandaman ang pagbalhin sa kindergarten ngadto sa 12th (K+12) program.
Ang summit nagtumong nga ma-update ang mga pribadong tunghaan sa maong programa ug mahatag ang plataporma aron istoryahan ug diskusyonan tali sa mga tunghaan ang mga isyong dunay kalabutan sa transisyon, gasto, ug curriculum.
Mahinumdoman nga niadtong miaging tuig, gipahayag na sa Department of Education ang kaandam niining ipatuman ang programang K+12 sa tibuok nasod.
Ilalom sa K+12 program, ang kasamtangang 10-year basic education nga gilangkuban sa 6 ka tuig sa elementarya ug 4 ka tuig sa sekondarya himoon nang 12 ka tuig. Kini pagalangkuban sa 6 ka tuig sa elementarya; 4 ka tuig sa junior high school ug 2 ka tuig sa senior high school.
Sumala pa sa DepEd, ang programa makapa-improve sa katakos sa mga estudiante sa nagkalain-laing subjects sama sa English, Mathematics, ug Science ug hingpit nga mag-andam kanila sa sunod nga ang-ang sa ilang pagtungha nga mao ang kolehiyo ug paghupot ug tukmang katakos nga mahimong globally-competitive para sa local ug kalibutanong pagpanarbaho.(ATR/PIA9-Zambo Norte)
