ni Franklin P. Gumapon
DIPOLOG CITY, Jan. 27 (PIA) – Namahayag si Presidential Adviser on the Peace Process Teresita Quintos-Deles nga ang proseso sa kalinaw gakinahanglan ug halawum nga pagsabut aron dili madala sa mga sayup nga isyu nga gipangsabwag karon.
Sa iyang pakigpulong sa Bishops-Businessmen’s Conference (BBC) for Human Development didto sa kauluhan karong bag-o, si Deles nagkanayon nga malisud ang proseso alang sa kalinaw ug dili dali makab-ot sa usa ka panagtag-bo lamang.
Gipasabot ni Deles nga ang panagsabot sa kalinaw gakinahanglan ug mga tigpaluyo nga maoy motabang sa pagpasabot sa maong proseso.
Ang proseso sa kalinaw nagkinahangalan ug maayong pagsabot ug igong pagsalig aron ang katawhan dili dayun madala sa unsa mang isyu nga motumaw batok niini, dugang ni Deles.
Matud pa ni Deles nga dali ra makuha gikan sa mga balita ang mga isyu sama sa giingon nila nga ang peace adviser ug ang mga negosyador kuwang sa kahibalo ug mga wal-wal.
Sa pangutana kon unsaon sa taga simbahan nga makatabang sa proseso alang sa kalinaw, si Deles nagkanayon nga gikinahanglan ang masaligong pagduyog sa tanan.
Iya sab nga gipasabot nga kinahangalan nga adunay mga “peace monitor” nga motabang paglantaw sa mga proyekto nga gipahimutang sa PAMANA kon Payapa at Masaganang Pamayanan (Peaceful and Resilient Communities) program sa mga “conflict areas.”
Ang PAMANA usa ka programa sa kagamhanan nga nagtumong sa pagpalambo sa kahimtang sa mga katawhan ug komunidad aron masulbad ang kalisud nga maoy hinungdan sa kagubot. (FPG/PIA-Zamboanga del Norte)
