ni Franklin P. Gumapon
DIPOLOG CITY, Jan. 9 (PIA) - - Panahon na nga maundang ang kagubot sa Mindanao.
Mao kini ang pamahayag ni Presidential Adviser on the Peace Process Teresita Quintos-Deles sa adlaw sa bisperas sa panagsabot sa mga membro sa peace panel tali sa kagamhanan ug sa Moro Islamic Liberation From (MILF) didto sa Kuala Lumpur sa nasud sa Malaysia karong bag-o.
Matud pa ang maong panagsabot nga nagsugod karong adlawa molungtad hangtud sa Miyerkoles.
Gilauman nga tuki-on atol sa maong panagtigum ang mga lakang nga mosampot sa usa kam malinawong kasulbaran sa kaguliyang sa Mindanao gumikan sa mga rebeldeng Muslim.
Gilauman ni Deles nga ang mga membro sa peace panel makahimo ug usa ka pamaagi aron masulbad ang politikanhong panagbangi tali sa mga rebeldeng Muslimn alang sa maluntarong kalinaw dinhi sa Mindanao subra sa 30 katuig na ang nakalabay.
Kahinumduman nga ang kagubot sa Mindanao mikalas na ug 150,000 ka kinabuhi sukad kaniadtong tuig 1974 nga mi-alsa batok sa gobyerno ang Moro National Liberation Front (MNLF) nga gipangulohan ni Nur Misuari. Nakab-ot ang usa ka kasabutan sa kalinaw tali sa kagamhanan ug sa MNLF kaniadtong Septembre 2, 1996 sa pamunu-an ni kanhi Presidente Fidel V. Ramos.
Pero pipila ka bulan human makab-ot ang maong kasabutan sa kalinaw tali sa kagamhanan ug MNLF, mitumaw na usab ang laing grupo sa mga rebeldeng Muslim nga gitawag ug Moro Islamic Liberation Front (MILF).
Nagsugod ang panagsabot sa kalinaw tali sa MILF ug sa kagamhanan apan sa matag karon ug unya gitugaw kini sa giyera tali sa mga MILF ug kasundalohan.
Ang grabeng kagubot nahitabo kaniadtong Agosto 2008 sa dihang wala madayon ang pag-pirma sa Memorandum of Agreement on Ancestral Domain (MOA-AD) didto sa Kuala Lumpur, Malaysia.
Bisan pa niining tanan, naglaum gihapon ang kagamhanan nga makab-ot ra gihapon ang sulbad sa kaguliyang dinhi sa Mindanao. (FPG/PIA-Zamboanga del Norte)