Ni Alma L. Tingcang
PAGADIAN CITY , Jan 5 (PIA9) – Ang Philippine Amusement and Gaming Corporation (PAGCOR) mibayad sa kantidad nga P857 milyon isip unpaid back taxes sa nakalabay nga administrasyon ngadto sa Bureau of Internal Revenue (BIR).
Ang maong back taxes naglangkob sa tuig 2004-2010 sa dihang gitangtang ang PAGCOR gikan sa listahan sa mga ahensiya nga exempted sa pagbayad ug Corporate income Tax.
Ang gaming firm nga gipanag-iya sa kagamhanan mitutol sa constitutionality sa maong ruling, ug gibarogan niini nga ubos sa iyang charter, exempted kini sa pagbayad sa nasangpit nga tax. Apan niadtong nakalabay nga tuig, ang Supreme Court miingon nga constitutional ang pagtangtang sa PAGCOR gikan sa listahan sa mga Corporate Income Tax-exempt entities.
Human sa maong SC ruling, ang PAGCOR nakig-coordinate sa BIR aron pag-audit sa back taxes nga kinahanglan bayaran sa ilang ahensiya. Aron pagpasayon sa pagbayad sa maong tax, ang PAGCOR naghimo ug inisyal nga computation sa ilang tax obligation ug gisumite kini ngadto sa BIR niadtong Disyembre, 2011.
“Nakigsulti kami kang BIR Commisssioner Kim Jacinto-Henares ug gipasabot siya sa among tinguha nga boluntaryong tumanon ang among tax obligations pinaagi sa paghatag ug P857 milyon nga unpaid back taxes. Mao kini ang among pamaagi aron pagtabang nga makalikom ug dugang pondo alang sa kagamhanan,” si PAGCOR Chairman ug CEO Cristino Naguiat Jr. miingon.
Matod pa ni Naguiat, ang BIR miuyon nga dawaton nila ang P857 milyon isip partial payment sa tax liabilities sa PAGCOR.
“Ang maong kantidad ipailalom pa sa validation sa BIR. Adunay on-going nga audit investigation. Dili kami magmakuli sa pagbayad sa tukmang buhis ngadto sa atong gobyerno,” pahayag ni Naguiat.
Ang PAGCOR maoy ikatulong labing dakong revenue-generating nga ahensiya sa kagamhanan sunod sa BIR ug sa Bureau of Customs. Gikan Enero ngadto sa Nobyembre 2011, ang maong ahensiya naka-generate ug gross revenues nga mikabat ug P33.15 bilyon, diin ang P15.51 bilyon niini gi-channel ngadto sa socio-civic programs isip kontribusyon sa PAGCOR alang sa nation-building. (ALT/PIA9/Zambo Sur)