ni Alfonso T. Ruda
DIPOLOG CITY, JAN. 26(PIA)---ANG Home Development Mutual Fund (HDMF kon PAG-IBIG) nagdeklarar ug tulo-ka-bulang moratorium sa pagbayad sa housing loan sa mga membro nga nakaangkon ug dakong kadaot gumikan sa bagyong si Sendong.
Una niini, milugway usab ang PAG-IBIG ug tabang-pinansyal sa mga membrong biktima ni Sendong dinhi sa Mindanao pinaagi sa ilang Calamity Loan Program.” Mas gipalapdan karon sa Fund ang pagtabang sa ilang mga membro pinaagi sa paghatag ug moratorium sa pagbayad sa housing loan dues,” matod pa ni Bise Presidente Jejomar Binay,
Ghisgutan pa ni Binay ang kalisdanan nga nasinatian sa mga biktima sa bagyong si Sendong nga nagkinahanglan sa tanang matang sa tabang nga ikalugway ngadto kanila.
Sayo niini, ang Bise-Presidente, isip Chairman sa Housing and Urban Development Coordinating Council(HUDCC) mimando sa tanang key shelter agencies nga mohatag ug hinanaling tabang sa mga biktima ni Sendong pinaagi sa paghatag ug moratorium sa pagbayad sa ilang amortization o pagsuspende sa penalidad o interest sa ilang loan. Gimando usab ni Binay ang diha-dihang pagpatuman sa moratorium.
Matod pa ni PAG-IBIG Executive Officer Atty. Darlene Berbesabe, ang moratorium maoy usa ka matang sa pagtabang sa PAG-IBIG sa iyang mga membro nga makabangon sa ilang kinabuhi ug panginabuhian.
Ang moratorium magsakop sa pagbayad sa amortization gikan sa Disyembre 16, 2011 hangtud sa Pebrero 16, 2012. Makapahimulos sa moratorium ang mga biktima ni Senadong kang kansang panimalay nangaguba o kang kansang panginabuhian na-apektuhan sa nasangpit nga bagyo.
Para makapahimulos sa moratorium, kinahanglang ma-update ang housing loan sa membro hangtud niadtong Diosyembre 15, 2011. Ang mga apektadong membro gihatagan ug 30 ka adlaw aron moduso sa ilang aplikasyon para sa moratorium.
“Ang Calamity Loan Program mahimo pa gihapong mapahimuslan sa mga membrong apektado ni Sendong, diin gihatagan sila ug 90 ka adlaw nga nga moduso sa aplikasyon para sa moratorium human nga nadeklalrar ang ilang lugar ilalom sa State of Calamity,” matod pa ni Berbesabe.
Ilalom sa programa, ang usa ka membro mahimong makahulam ug hangtud sa 80 porsiento sa iyang kinatibuk-ang natigom, base sa gidugayon sa iyang pagka-membro sa PAG-IBIG.(ATR/PIA9-Zambo Norte)
