ni Franklin P. Gumapon
DIPOLOG CITY, Jan. 6 (PIA) - - Mikabat sa P136 milyones ang gipagawas karong bag-o sa Pag-IBIG Fund isip calamity loan sa may 6,500 ka mga membro nga na-igo sa bagyong Sendong sa Kabisay-an ug Mindanao.
Si Bise Presidente Jejomar Binay, kinsa kasamtangang chairman sa Pag-IBIG board of trustees, mipagawas ug usa ka direktiba nga nagmandu sa pagpagawas ug pundo aron ipahulam sa ma membro sa Pag-IBIG nga nabiktima sa bagyo sa mga dakbayan sa Cagayan de Oro, Iligan ug Dumaguete.
Gawas sa calamity loan, kadtong mga apektadong member-borrower sa Pag-IBIG housing loan nakahimo na usab sa pag-file sa ilang insurance claims alang sa ilang nangagubang balay.
Sa iyang pagdu-aw didto sa mga dakbayan sa Cagayan de Oro ug Iligan, gipahibalo ni Binay sa mga apektadong membro sa Pag-IBIG nga pwede silang mo-apply sa calamity loan.
Ang maong buhatan nakasugod na sa pagpanawat ug mga application sa calamity loan sugod kaniadtong Desyembre 19. Mipahimutang usab ang Pag_IBIG ug mobile offices nga gitawag nga Pag_IBIG on Wheels, aron modawat sa mga loan application.
Gihimo sa mga opisyales ug empleyado sa Pag-IBIG ang ilang Christmas ug anniversary get-together nga usa ka fund-raising event alang sa mga nabiktima sa bagyo.
Ang Pag-IBIG nakahatag ug P2 milyones nga balor sa relief goods alang sa mga naigo ni Sendong.
Ang maong donasyon giapod-apuid ngadto sa may 3,800 ka pamilya nga nahimutang sa mga evacuation center sa Cagayan de Oro ug laing 1,600 ka pamilya sa Iligan. Ang ubang hinabang gitunol ngadto sa lokal nga kagamhanan sa Opol, Misamis Oriental alang sa may 2,908 ka pamilya nga naigo usab sa bagyo. (FPG/PIA-Zamboanga del Norte)
