Ni Alma L. Tingcang
PAGADIAN CITY, January 30 - - Ang kagamhanang Aquino nagsugod pag-implementar sa mga lakang aron pagtubag sa problema sa polusyon nga naghulga sa supply sa isda ug uban pang produkto sa dagat, usa ka opisyal sa Malacanang miingon.
Sa usa ka interview sa dzRB Radyo ng Bayan niadtong Sabado, si Deputy Presidential Spokesperson Abigail Valte miingon nga ang Bureau of Fisheries and Aquatic Resources (BFAR) ingon man ang Department of Environment and Natural Resources (DENR) aktibong naglihok karon aron mapugngan ang marine pollution.
“Nakipag-coordinate na ang BFAR ubos ni Atty. Asis Perez aron mabungkag sa mga local government units (LGUs) ang mga illegal pens,” si Valte miingon.
Sa pakigtambayayong sa ubang mga ahensiya sa gobyerno, ang BFAR nagpadayon pagpalapad sa mga paningkamot alang sa hingpit nga pagtapos sa gawi nga paglabay ug mga basura sa dagat nga maghatag ug peligro sa marine environment.
Gipasalig ni Valte nga ang kagamhanang Aquino nagpabiling lig-on sa iyang baroganan aron pagpugong sa polusyon sa hangin, yuta man ug dagat.
“Si DENR Secretary Ramon Paje misaad nga ipalambo ang air quality management program tungod sa mga taho nga ang air pollution maoy usa sa nag-unang tulo ka major health issues nga giatubang sa nasod,” si Valte nagkanayon.
“Ikaduha, nasayod ang DENR kalabot niana. Kung nahinumduman ninyo nga aduna kitay gihimo nga crackdown sa mga smoke emission testing centers nga walay lisensiya o kaha daghan kaayo ang sertipikasyon nga wala man gihapon nila gina-test,” pahayag ni Valte.
“Tungod niini, mikunhod usab ang atong pollution index. Nasayod na ang DENR kabahin niini,” siya midugang.
Ang mga taho gikan sa UN marine experts miingon nga ang mga puy-anan sa isda nadaot tungod sa polusyon ug climate change. Nag-awhag kini sa mga kagamhanan ug mga negosyante nga maghimo ug mga lakang aron mapugngan ang polusyon.
Si Vincent Sweeney, United Nations Environment Programme coordinator alang sa Global Program of Action aron pagpugong sa marine environment degradation gikan sa mga land-based pollutants miingon nga hangtod 90% sa sewage sa mga developing countries ang na-discharge diha sa mga suba, lake ug mga dagat nga maoy nagsilbing pinakagrabeng hulga diha sa atong mga water resources. (ALT-PIA9/Zambo Sur)
