Ni Alma L. Tingcang
PAGADIAN CITY, January 28 - - Gilusad sa Department of Trade and Industry (DTI) kagahapong adlawa, Biyernes, ang usa ka web-based on line registration system nga naglaom pagpamubo sa proseso sa paqkignegosyo dinhi sa nasod diha usab sa pinakamenos nga gastoson.
Si Presidente Benigno Aquino III ug si DTI Secretary Gregory Domingo maoy nangulo sa maong paglusad sa Philippine Business Registry (PBR), usa ka one-stop shop alang sa mga negosyante.
Ang PBR usa lamang sa priority projects sa gobyerno nga nagtutok aron pagpatunhay sa proseso sa business registration ug pagwagtang sa “red tape”.
Magsilibi siya isip usa ka one-stop shop alang sa mga negosyante nga kinahanglan makig-transaksiyon sa daghang ahensiya aron pagsugod ug usa ka negosyo. Pinaagi sa PBR, ang mga aplikante dili na kinahanglan moadto sa matag ahensiya aron pagrehistro sa ilang negosyo tungod kay makonekta na sila pinaagi sa PBR.
Ang mga ahensiya naglakip sa Department of Trade and Industry, Bureau of Internal Revenue, Social Security System, Home Development Mutual Fund, Philippine Health Insurance Corp., ug Securities and Exchange Commission. Sa level sa mga local government units, ang Quezon City pa lamang ang konektado sa PBR system.
Ang mga kompanya puwede nga mo-apply gikan sa ilang opisina pinaagi sa PCs o moadto sa DTI ug morehistro pinaagi sa PBR kiosks o tellers. Ang application pinaagi sa teller naglangkob sa pagsumite ug filled-up application form nga puwede ma-download gikan sa website.
Kining maong sistema naglaum pag-establisar sa usa sa hingpit ug segurado nga national business registry database nga maghiusa sa tanang impormasyon gikan sa mga ahensiya sa gobyerno ug ipasayon ang pamaagi sa transaksiyon pinaagi sa pagbukas ug usa ka bintana alang sa online business registration tali sa mga ahensiya.
Pinaagi sa hamubo ug paspas nga proseso, mapalig-on sa PBR ang mga paningkamot sa gobyerno aron mahatagan ug de-kalidad nga serbisyo ang katawhan ug pagtuman sa ilang saad nga mabuntog ang korupsiyon ug makunhoran ang red tape sa burukrasya. Tungod usab ning maong paagi, ang atong nasod mahimong madanihon ngadto sa mga mamuhunang negosyante ug mouswag ang atong ranko aron mahimo kitang globally competitive nga nasod. (ALT-PIA9/Zambo Sur)
