ni Alfonso T. Ruda
DIPOLOG CITY, JAN. 30(PIA)--- Ang Philippine National Police mipalapad karon sa ilang nasudnong planong pagreforest sa kabukiran sa nasod pinaagi sa pagtanom ug 10 ka milyones ka nagkalain-laing matang sa kahoy.
Alayon niini, usa ka Memorandum of Agreement ang nakatakdang pirmahan karong adlawa tali nila ni Secretary Ramon Paje sa Department of Environment and Natural Resources ug PNP Chief, Director-General Nicanor Bartolome alang sa pagsugod sa PNP-initiated greening project nga gitawag ug “Pulis Makakalikasan: Sampung Milyong Puno Pamana sa Kinabukasan.”
Ang seremonya mao ang highlights sa pagsaulog sa Founding Anniversary sa PNP, nga pagasugdan pinaagi sa flag-ceremony nga pagasundan sa Parade and Review,uban kang DILG Sec. Jesse Robredo isip pinasidunggang dinapit.
Matod pa ni Bartolome, ang 10-Million Trees for 7,100 Islands Project sa PNP usa ka suporta sa National Climate Change Action Plan sa Climate Change Commission.
“Kining maong kalihokan maoy suporta sa PNP sa National Greening Program sa gobyerno nga nagtumong mapatubo ang 1.5 bilyones ka mga kahoy sulod sa unom ka tuig gikan sa 2011 ngadto sa 2016,” matod pa ni Bartolome.
Ilalom sa maong proyekto, tinguhaon sa 140 mil ka membro sa puwersa sa kapulisan nga makatanom ang matag usa kanila ug 6 ka kahoy matag bulan sa mosunod nga 12 ka bulan.
Kompiyansa si Bartolome nga malampasan sa PNP ang 10 milyones nga target uban ang partisipasyon sa pamilya sa mga pulis, force multipliers, accredited NGOs, LGUs ug mga volunteers.
Sumala pa sa tigpamaba sa PNP nga si Chief Supt. Agrimero Cruz Jr., gimanduan na ni Bartolome ang mga rehiyonal nga buhatan sa PNP nga ilhon ang mga bakanteng yuta sa gobyerno nga gamiton sa reforestation uban ang pakigtinabangay sa DENR ug LGUs.
“Ang matag rehiyonal nga buhatan sa PNP gimanduan usab pagpabarog ug ilang kaugalingong nursery nga butangan sa mga similya sa mga gahing kahoy ug nagkalain-laing matang sa bungang-kahoy,” matod pa ni Cruz.
“Aron higpit nga mabantayan ang dagan sa reforestation program, ang mga LGUs maghatag ug sertipikasyon aron pamatud-an ang aktwal nga pagkahuman sa pagpananom ug kahoy sa ilang lokalidad,” patin-aw pa ni Cruz. (ATR/PIA9-Zambo Norte)