Ni Alma L. Tingcang
PAGADIAN CITY , Jan 6 (PIA) – Ang Bureau of Customs (BOC) mohatag ug donasyon nga P20-milyon kantidad sa imported “ukay-ukay” gikan sa Hongkong ngadto sa liboan ka mga biktima sa bagyong Sendong sa Mindanao.
Si BOC Commissioner Ruffy Biazon miingon nga lima (5) ka 40 ft. container vans sa mga used clothing ang nasakmit didto sa pantalan sa Manila niadtong Disyembre 7 pinaagi sa mga operatiba sa BOC Operations and Intelligence Office of the Enforcement Group.
Si Biazon, kinsa miila sa mga importers isip ang Heritage Asia International Products Trading Corp. ug Global Welltrade Trading Co. miingon nga sila pasakaan ug kaso sa korte sa dili madugay tungod sa paglapas sa Section 2053 pinaagi sa pag-misdeklarar ug Republic Act 4653 nga nagdili sa importasyon sa used clothing.
“Atong gisugdan ang tuig sa usa ka mas gipalapdan nga kampanya batok sa smuggling ug mas madali nga pagpasaka ug kaso batok sa mga smugglers,” si Biazon miingon.
“Gusto nakong sugdan ang tuig pinaagi sa usa ka bahad ngadto sa mga smugglers nga dili makigbangi sa Bureau of Customs, tungod kay aduna silay luna sa mga presohan, diin sila angay ibalhog,” matod pa niya.
Samtang sa iyang kabahin, si Customs deputy commissioner for enforcement group Horacio Suansing miingon nga aduna silay gi-isyu nga seizure order alang sa mga “ukay-ukay” human irekomendar sa duha ka opisyales sa maong buhatan nga sila si Imelda Cruz ug Capt. Arnel Baylosis ang alert order alang sa lima ka container vans tapos ang surveillance sa maong shipment sa pipila ka semana.
“Among dalion ang paghikay sa mga papeles niining mga nasakmit nga ukay-ukay aron mabalhin na kini didto sa Department of Social Welfare and Development (DSWD) ug maapod-apod na kini alang sa mga niktima sa Sendong didto sa Mindanao,” si Suansing miingon sa usa ka pamahayag.
Matod pa ni Suansing, ang Global Welltrade Trading Co. mao ang alleged consignee sa upat ka container vans sa “Ukay-ukay” nga kantidad ug P16 milyon samtang ang Heritage-Asia International Products Trading Co. maoy consignee sa usa ka container van nga kantidad ug P4 milyon. (ALT-PIA9/Zambo Sur)