ni Alfonso T. Ruda
DIPOLOG CITY, JAN. 5(PIA)---Ang mga benepisyaryo sa Cash-for-Work Program sa dakbayan sa Cagayan de Oro ug Iligan nga naka-angkon ug dakong kadaot gumikan sa bagyong si Sendong magdawat ug suhol nga tag Php250.00 matag adlaw.
Sumala pa sa Department of Social Welfare and Development, duna nay pasiunang 28 milyones ka pesos nga gigahin ang gobyerno alang sa maong programa.
Matod pa sa DSWD, dili momenus 20 ngadto sa 40 mil ka mga pamilya ang makabenpisyo niining maong inisyatibo sa gobyerno.
Ang mga benepisyaryo magtrabaho sa nagkalain-laing rebuilding ug reconstruction projects sa gobyerno sa nasangpit nga rehiyon 10.
Base sa talaan sa National Disaster Risk Reduction and Management Council, dili momenus sa 1,400 ka tawo ang namatay sa Visayas ug Mindanao gumikan sa bagyong si Sendong.
Ang daghang nangamatay ug dakong kadaot nga gidulot sa bagyong Sendong maoy nagtukmod kang Presidente Benigno Aquino III aron ipailalom sa State of Calamity ang pipila ka mga lalawigan sa Mindanao.
Kasunod niini, mi-apela usab ang Department of Foreign Affairs sa mga mahigalaong nasod ug mga institusyon alang sa makitawhanong hinabang ngadto sa mga biktima sa kalamidad.(ATR/PIA9-Zambo Norte)
