Ni Alma L. Tingcang
PAGADIAN CITY, January 27 - - Si Presidente Benigno Aquino III mangulo sa paglusad sa Philippine Business Registry System (PBRS) karong adlawa didto sa Makati City nga nagtumong aron pagpadali sa pagrehistro sa mga negosyo dinhi sa nasod.
Ang PBRS usa ka web-based nga sistema diin nga magsilbi isip usa ka one-stop shop alang sa mga negosyante nga gusto mo-transact o moparehistro sa ilang negosyo, sa Bureau of Internal Revenue (BIR) ug Home Development Mutual Fund (Pag-IBIG), Philippine Health Insurance Corp. (PhilHealth) ingon man sa Social Security System (SSS). Kining mga dokumento maoy mga rekisitos kung mobukas ug usa ka negosyo.
Ang computerized nga registration system magdugtong niining mga nasangpit nga ahensiya aron ang mga aplikante mahimong morehistro sa ilang mga negosyo bisan pa wala ang ilang presensiya.
Pinaagi sa PBRS, ang mga sole proprietors makaparehistro sa ilang business name, makakuha ingon man makavalidate sa ilang tax identification number (TIN) ug makaangkon sa ilang employer registration numbers gikan sa SSS, PhilHealth ug Pag-IBIG Fund.
Atol sa paglusad sa maong programa, ang presidente pakisayran sa aktuwal nga pag-apply sa mga kliyente. Gitakda usab siya nga motambong sa awarding sa citation certificates ngadto sa lima (5) ka mga nalakip nga ahensiya.
Ang presidente pagaubanan ni Trade Secretary Gregory Domingo, Trade Undersecretary Zenaida Maglaya ug Provincial Director Arnaldo del Rosario sa Department of Trade and Industry-National Capital Region. (ALT-PIA9/Zambo Sur)
