DIPOLOG CITY, JAN. 1(PIA)--Tinukmod sa tinguhang mapahimuslan ang kinatibuk-ang ekonomikanhong potensyal sa Mindanao, naggahin karon ang administrasyong Aquino ug 718 milyones ka pesos aron himoong mga peace and development communities ang mga kanhing kampo sa Moro National Liberation (MNLF).
Kini, subay sa nakasabutan sa gipirmahang pinal nga kasabutan sa kahusay ug kalinaw tali sa gobyerno sa PIlipinas ug MNLF niadtong 1986.
Niadtong Biyernes, si Presidential Adviser on the Peace Process, Secretary Teresita Deles mipirma ug Memorandum of agreements uban sa Kagamhanang-Panlalawigan sa Maguindanao, Lanao del Sur, Tawi-Tawi-, Basilan ug Sulu alang sa pormal nga panag-alyansa ilalom sa PAMANA kon Payapa at Masaganang Pamayanan Program (Peaceful and Resilient Communities) nga naghatag ug pondo para sa mga proyekto sa PDC sa MNLF sa Autonomous region in Muslim Mindanao(ARMM) didto sa buhatan sa OPAPP sa Tasguig City.
Ang uban pang mipirma sa kasabutan mao sila si Lanao del Sur Governor Mamintal Adiong, Jr; Sulu Gov. Abdusakur Tan; Tawi-Tawi Gov. Sakidul Sahali; Basilan Gov. Jurn Akbar ug Provincial Peace and Development Officer Dave Utto kinsa mirepresentar kang gov. Esmael Mangudadatu; OPAPP Undersecretary Dimasangcay Pundato ug ARMM Vice-Gov. Bainon Karon nga nagrepresentar kang Regional Gov. Mujiv Hataman; ug gisaksihan ni Wahida Abtahe , ang pangulo sa Federation of United Mindanawan Bangsamoro Women Multi-Purpose Cooperative (FUMBWMPC).
Ang mga proyekto sa PAMANA ipatuman pinaagi sa partnership agreements tali sa OPAPP ug sa mga hingtungdang kagamhanang-lokal.
Ang mga proyektong ipatuman sa PAMANA-PDC langkuban sa konstruksyon sa farm-to-market roads, tulay, bodega, water supply system, health centers, community peace centers, irrigation systems, ug uban pa.
Makauban sa OPAPP sa maong gimbuhaton ang FUMBWMPC aron masiguro nga andam ang mga benepisyaryong komunidad sa pagsulod sa PAMANA.
Ang FUMBWMPC maoy magsilbing ikatulong partido nga magmonitor sa klarong implementasyon sa mga proyekto.
Ang PAMANA nga usa ka programa sa gobyerno alang sa kahusay ug kalambuan, nagtumong nga mapaubsan ang kapobrehon, mapalambo ang pagdumala sa gobyerno ug mahatagan ug gahum ang mga komunidad nga apektado sa kagubot.(ATR-PIA9-Zambo Norte)