ni Alfonso T. Ruda
DIPOLOG CITY, DEC. 13(PIA)--- Gipasalig sa bag-ong natudlong Hepe sa Armadong Kusog sa Pilipinas nga si Lt. Gen. Jessie Dellosa nga maoy iyang hatagan ug dakong pagtagad ang pagpanalipod sa teritoryo sa Pilipinas ug pagpadayon sa negosasyon sa kalinaw uban sa Moro Islamic Liberation Front kon MILF.
Sa seremonyna gipahigayon kagahapon didto sa Camp Aguinaldo, Quezon Quezon City, pormal nga gitudlo ni Presidente Benigno Aquino III si Dellosa isip ika-43 nga Hepe sa Armadong Kusog sa PIlipinas, puli kang Gen. Eduardo Oban Jr., nga moretiro na sa serbisyo karong adlawa human nga miabot na kini sa iyang mandatory retirement age nga 56 anyos.
Sa iyang pagdawat sa iyang bag-ong katungdanan, gipahayag ni Dellosa nga ang iyang programa sa AFP naka-angkla sa 4 ka nanag-unang tema-Una, ang pagpalig-on sa territorial defense, ilabi na sa kapabilidad sa Philippine Navy paghatag ug seguridad sa West Philippine Sea; ikaduha, ang hingpit nga implementasyon sa Internal Peace and Security Plan-Bayanihan; greater disaster preparedness; ug reporma sa organisasyon lakip na ang fiscal transparency.
Matod pa ni Dellosa, iyang i-ipromote ang proseso sa kalinaw uabn sa MILF isip centerpiece sa IPSP-Bayanihan ug pagsagop sa all-out-justice policy ni Presidente Benigno Aquino III ug base usab sa samad nga iyang naangkon panahon sa gubat ug sa iyang nakitang di-maayong epekto sa all-out-war sa atong komunidad.
Sa iyang bahin, si Presidente Aquino kinsa nga misaksi sa pagbalhin sa liderato sa AFP gikan kang Gen. Oban ngadto kang Lt. Gen. Dellosa, subling mipabati sa kinatibuk-ang suporta sa iyang administrasyon ug sa katawhan sa liderato ni Delllosa ug sa AFP modernization program.
Ang 54 anyos nga si Dellosa nga mao kanhi ang Aide-de-Camp ni anhing Presidente Corazon Aquino ug membro sa Philippine Military Academy “Matapat” Class 1979, mao na ang ika-43 nga Hepe sa Armadong Kusog sa Pilipinas. (ATR/PIA9-Zambo Norte)