Ni Alma L. Tingcang
CAGAYAN DE ORO CITY, December 21 - - Ang kagamhanan modeklarar ug state of national calamity areas sa Visayas ug Mindanao niadtong mga lugar nga naapektohan sa bagyong Sendong, si Presidente Benigno Aquino III miingon kagahapong adlawa. Mibisita siya sa Cagayan de Oro City aron pagsuta sa sitwasyon sa mga residente didto ug aron pagtubag sa mga panginahanglan tapos ang kadaot nga dala sa bagyong Sendong. Ang nasangpit nga kalamidad mikalas sa gatosan ka kinabuhi ingon man daghan pa usab kaayo ang wala pa nakaplagi sa mga rescue team sukad niadtong Sabado hangtod karong adlawa. Liboan ang anaa karon sa mga evacuation centers ug temporary shelter. Ang mga local nga opisyales sa Cagayan de Oro City mipaabot sa ilang mga kabalaka ngadto sa presidente atol sa usa ka briefing nga gipahigayon didto sa Philippine Air Force base sa Lumbia airport. Gipasalig sa presidente nga adunay igong pondo alang sa relief assistance ug rehabilitasyon aron paghupay sa sitwasyon sa mga biktima. Gawas sa pondo nga gikan sa nasudnong kagamhanan, adunay suporta nga gikan sa mga langyaw nga nasod, ang uban pinaagi sa mga loans ug mga equipo ingon man paghatag sa ilang serbisyo ug kahanas sa mga sitwasyon nga sama niini. Human sa iyang pakigtagbo sa mga opisyales sa Cagayan de oro City, milupad siya padulong sa Iligan City aron pag-apud-apod sa mga relief goods sa mga biktima didto nga nasalanta usab sa bagyong Sendong. Tapos sa pagbisita sa Iligan, mibalik siya sa Cagayan de Oro aron usab pagtabang sa distribusyon sa relief goods didto ug pagkaudto migikan padulong sa Dumaguete nga apektado usab sa nasangpit nga bagyo. Sumala pa sa National Disaster Risk Reduction Management Council (NDRRMC), mikabat na sa libo ang namatay sa maong bagyo samtang daghan pa usab kaayo ang wala pa nakaplagan sa mga rescue team hangtod karon. (ALT-PIA9/Zambo Sur) |
