ni Franklin P. Gumapon
DIPOLOG CITY, Dec. 23 (PIA) - - Gi-awhag karon sa Malakanyang ang mga opisyales sa kagamhanang lokal nga gamiton sa ensakto ang pundo nga gigahin alang sa mga nabiktima sa bagyong Sendong sa Visayas ug Mindanao.
Atol sa gihimong press briefing didto sa Malakanyang karong-bag-o, gihangyo ni Edwin Lacierda, ang presidential spokesperson, nga gamiton sa ensakto ang pundo alang sa mga nabiktima sa bayong Sendong human mipahibalo si Pangulong Benigno Simeon C. Aquino III nga kamulo na karon ug pangabot ang mga hinabang gikan sa laing mga nasud alang sa mga baigo sa bagyo.
Gipahibalo usab sa hepe ehekutibo nga ang Asian Development Bank (ADB) ug World Bank (WB) misaad nga ilang dugangan ang ilang gipahulam sa Pilipinas.
Dugang sa Malakanyang nga ang mga nasud sa US, Japan, China, Russia, Spain ug uban pang kanasuran ang misaad nga mohatag ug tabang alang sa mga nabiktima sa bagyo.
Gipasalig ni Lacierda nga dili moadto sa bulsa sa mga opisyales sa kagamhanang lokal ang mga kwarta nga hinabang sa mga pamilyang naigo sa bagyo.
Gawas sa tabang gikan sa laing mga nasud, andam na usab karon ang kagamhanan nga mopagawas ug P1.17 bilyones alang sa mga biktima sa bagyong Sendong nga mihapak sa amihanang Mindanao ug Visayas sa miaging semana. (FPG/PIA-Zamboanga del Norte)