ni Franklin P. Gumapon
DIPOLOG CITY, Dec. 26 (PIA) - - Gi-awhag karong bag-o ni Aurora congressman Juan Edgardo Angara sa gobyerno nga mogahin sa kantidad nga P40 bilyones ubos sa conditional cash transfer (CCT) isip tabang sa mga nabiktima sa bagyong Sendong.
Gipasabot ni Angara nga dili ang pangas-ang hatag ug mga grocery ang gikinahanglan sa mga nabiktima sa bagyo kon dili ang malahutayon nga paglugway ug hinabang arun makabarug sila’g balik.
Matud pa sa kongresista nga ang mga pamilyang naigo sa bagyo labaw pa kamakalolo-oy kay sa mga nahimong benepisaryo sa Pantawid Pamilyang Pilipino Program (4Ps).
Ang Department of Social Welfare and Development (DSWD) mao giphapon ang tahasan pag-panglista ug pag-ila sa mga nabiktima sa bagyo.
Dugang ni Angara nga ang P49.4 bilyones nga pahat sa DSWD sunod tuig mamahimo na niini’ng i-apil ang mga nabiktima sa bagyong Sendong.
Gipaklaro usab ni Angara nga dili tanan nga naagi-an sa bagyo sa mga dakbayan sa Iligan ug Cagayan de Oro ang makapahimulos sa CCT kon dili kadto lamang mga nawad-an ug mga balay.
Ang mga nabiktima ni Sendong mamahimong i-apil sa mga makapahimulos sa mga subsidy program sa DSWD sama sa P39.4 billion alang sa 4Ps, 2.9 alang sa supplementary feeding, ug 1.3 nillion alang sa social pension sa mga naglisud nga senior citizen.
Ang bagyong Sendong mihapak sa mga dakbayan sa Cagayan de Oro ug Iligan, mi-anud sa mga kabalayan ug mikalas sa kapin sa libo nga mga tawo kaniadtong Deciembre 17. (FPG/PIA-Zamboanga del Norte)