ni Alfonso T. Ruda
DIPOLOG CITY, DEC. 12(PIA)--- Giduso karon sa usa ka magbabalaod sa Kongreso ang usa ka balaodnon nga maghimo sa kapakyas pagliquidate sa cash advance sulod sa gitakdang panahon nga usa ka malig-ong basehan sa pagpasaka ug kasong malversation of public funds
Matod pa ni Pasig City Representative Roman Romulo, iyang gipadas-og ang maong balaodnon gumikan sa iyang pagkadismaya sa report sa Commission on Audit nga dunay dagkong kantidad sa mga wala pa gihapon ma-liquidate nga mga cash advances sa mga buhatan sa gobyerno.
Base sa report sa COA, niadto pa lang 2005, ang cash advances sa nasudnonong pangagamhanan miabot na ug 4.8 bilyones ka pesos.’
“Kon dili ensakto ang pagka-presentar sa financial report sa gobyerno, maka-apektar kini sa data nga makuha sa mga magbasa niini, ilabi na kabahin sa polisiya ug sa mga decision-makers sa gobyerno,” matod pa ni Romulo.
Alayon niini, giawhag ni Romulo ang iyang mga kauban sa Kongreso nga ipasa sa labing daling panahon ang House Bill No. 2009 nga maghimong prima facie proof sa malversation o mis-appropriation of public funds ang kapakyas sa usa ka opisyal sa gobyerno paglikquidate sa iyang cash advances sulod sa gitakdang panahon.
Lakip sa gustong maamendahan ni Romulo mao ang Article No. 217 sa Revised Penal Code nga maghimo sa kapakyas pag-lilquidate sa cash advance sa gitakdang panahon nga mahimo nang prima facie evidence sa pagpasaka ug kasong malversation of public funds.
Idugang sa HB 2009, ang usa ka parapo nga nagkanayon “In addition, the failure of public officer or employee, who was previously granted cash advance, to liquidate the same after the purpose for which it was given has been served within the following period shall be prima facie proof of malversation or misappropriation of the fund received, to wit: Salaries, Wages, etc, within five days after each 15th day/end of the month pay period.
Alang sa petty operating expenses ug field operating expenses--- human sa 20 ka adlaw human sa katapusan sa tuig.
Alang sa special operations ug operating expenses o pagpalit ug mga supplies, materyales ug uban pang susamang kagamitan, nga dili molapas sa 100 mil pesos---20 ka adlaw pagkahuman sa operasyon, o paghatod ug pagdawat sa mga supplies ug mga materyales.
Alang sa lokal nga mga biyahe---15 ka adlaw human nga ang empleyado makabalik sa iyang opisyal nga istasyon. Samtang alang sa mga biyahe sa gawas sa nasod, mga 60 ka aldaw o usa ka bulan human nga mahibalik siya sa PIlipinas.
Ang uban niini, mga 6 ka bulan human ang katuyoan sa maong cash advance gihatag.
Matod pa ni Romulo ang Revised Panal Code ug Presidential Decree no. 1445 parehong dunay higpit nga probisyon may kalabutan sa mga cash advances, mga limitasyon, ug responsibilidad sa mga opisyal nga nag-cash advance.
Depende sa gidak-on sa kantidad nga nalambigit, ang silot sa mga nakasala pagkalangkuiban sa prison correcional ngadto sa reclusion perpetua. (JPA/ATR/PIA9-Zambo Norte)
